Filippin hukumati mahalliy muxolifat chet eldan bo‘ladigan ko‘mak yordamida mamlakat prezidenti Rodrigo Duterteni hokimiyatdan chetlashtirish maqsadida davlat to‘ntarishi uyushtirish niyatidan xabar topdi, deb yozadi “TASS” Filippin davlat rahbari matbuot kotibi Martin Andanarga tayanib.
Uning so‘zlariga ko‘ra, yirik norozilik harakati tayyorlanayotgani haqidagi ma’lumot “AQShdagi ishonchga sazovor manbalar”dan olingan. Ma’lum bo‘lishicha, mahalliy muxolifat 2017-yil yanvarida Dutertening iste’foga chiqishini talab qilib, kampaniya boshlamoqchi, uni ko‘chalardagi ommaviy norozilik aksiyalari bilan to‘ldirmoqchi. Ularda qatnashishga da’vatlar allaqachon ijtimoiy tarmoqlar orqali tarqatilmoqda.
Filippin yetakchisi matbuot kotibi ta’kidlashicha, hukumat tayyorlanayotgan fitnaga tegishlicha chora ko‘radi. “Biz prezidentni har qanday yo‘l bilan himoya qilamiz”, — dedi Andanar. U Manilada bunday aksiyalar tashabbuskorlarining to‘liq ro‘yxati borligini qo‘shib qo‘ydi.
Duterte may oyida bo‘lib o‘tgan saylov natijalariga ko‘ra prezident etib saylandi. Rasmiy ma’lumotlarga ko‘ra, Duterte nomzodi uchun 16,6 milliondan ortiq saylovchi ovoz bergan.
Saylov natijalari e’lon qilingandan so‘ng, bo‘lajak prezident bir qator bir-biriga zid fikrlar bildirdi. Jumladan, u mamlakatda o‘lim jazosini qayta tiklamoqchi ekanligini ma’lum qildi. Shu bilan birga, qasamyod qabul qilish uchun keltirilgan davlat rahbari maochilar bilan muzokaralarni qayta yo‘lga qo‘yishga tayyor ekanligi ma’lum qilindi.
Izoh (0)