Qirg‘izistonning sobiq prezidenti Roza Otunbayeva O‘zbekiston Respublikasining Birinchi Prezidenti Islom Karimov vafoti munosabati bilan hamdardlik bildirdi. Bu haqda “Jahon” axborot agentligi ma’lum qildi.
“Men u kishi bilan Qirg‘iziston va O‘zbekistonda, boshqa davlatlar, yirik tadbirlar, sammitlarda o‘nlab marotaba uchrashgandim. Ayniqsa, 2005, 2010-yillarda, Qirg‘iziston uchun qiyin va xatarli vaqtlarda ko‘p ko‘rishdik. Prezident Karimovning qarorlari biz uchun o‘ta muhim, hatto hal qiluvchi ahamiyatga ega edi. U Qirg‘iziston o‘sha vaziyatlardan chiqishi uchun sharoit yaratgan, desam, adashmagan bo‘laman”, — deya ta’kidladi sobiq prezident.
Otunbayeva diniy mutaassiblikka yo‘l bermagan siyosatchi bo‘lgani uchun Islom Karimovdan minnatdor ekanligini e’tirof etdi. “Biz Islom Abdug‘aniyevich qanchalik hormay-tolmay mehnat qilishiga tan berardik. Mintaqamizda shunday yetakchi bo‘lganidan faxrlanishimiz lozim”, — dedi sobiq prezident.
Izoh (0)