AQSh prezidentligiga Demokratik partiyadan nomzod Hillari Klintonning ro‘yxatga olingan saylovchilar orasida tan olinmaslik bo‘yicha reytingi 59 foizga yetdi, uning Oq uy uchun kurashdagi raqibi — Donald Trampda esa ushbu ko‘rsatkich 60 foizga teng. Bu haqda ABC telekanali va The Washington Post gazetasi o‘tkazgan so‘rov natijalariga tayanib, “TASS” xabar berdi.
Klinton xalq orasidagi obro‘sini yo‘qotishiga va buning kuchayib borishiga, Langer Research Associates tadqiqot xizmati ekspertlari fikricha, jamoatchilik e’tibori yana uning maxfiy hujjatlar bilan ishlashda shaxsiy pochta serveridan foydalanganiga qaratilgani, shuningdek, Klintonlar fondi bilan bog‘liq vaziyat sababchi bo‘ldi.
Uni eng ko‘p qo‘llab-quvvatlagan saylovchilar guruhi — ayollar, yuqori darajadagi ta’limga ega shaxslar, ispan tilida so‘zlashuvchi amerikaliklar va liberal nuqtai nazarga ega kishilar o‘rtasida Klintonning ommabopligi eng ko‘p tushib ketgan.
Mutaxassislar hisob-kitoblariga ko‘ra, prezidentlikka ikkala nomzod ham 30 yil davomida olib borilgan so‘rovlar mobaynida aynan hozir eng obro‘siz holatga tushgan. Shu paytgacha ABC va The Washington Post so‘rovlari natijalariga ko‘ra, obro‘sizlik bo‘yicha rekord AQShning 41-prezidenti Jorj Bushga tegishli bo‘lgan: 1992-yil iyulida u haqda so‘rov ishtirokchilarining 53 foizi salbiy fikr bildirgan edi.
Izoh (0)