O‘zbekiston Respublikasi Prezidenti “O‘zbekiston Mustaqilligining yigirma besh yilligi munosabati bilan fan, ta’lim, sog‘liqni saqlash, adabiyot, madaniyat, san’at, ma’naviyat va ma’rifat, ommaviy axborot vositalari hamda ijtimoiy sohalar xodimlaridan bir guruhini mukofotlash to‘g‘risida”gi farmonni imzoladi. Hujjat matnini O‘zA keltirdi.
“Vatanimiz mustaqilligini mustahkamlash, milliy g‘oyani rivojlantirish, ma’naviyatimizni tiklash, o‘zligimizni anglash yo‘lida katta hissa qo‘shgan, yorqin iste’dodi va ijodi, ilmiy faoliyati, halol xizmati, yoshlarni ona yurtga muhabbat, istiqlol g‘oyalariga sadoqat ruhida sog‘lom va barkamol etib tarbiyalash hamda jamoat ishlaridagi faol ishtiroki uchun quyidagilar faxriy unvonlar va ordenlar bilan taqdirlansin”, — deyiladi farmonda.
Unga ko‘ra, Kamoliddin Behzod nomidagi Milliy rassomlik va dizayn instituti dotsenti, rangtasvirchi rassom Faxriddinov Zayniddin Ramziyevich hamda Alisher Navoiy nomidagi O‘zbekiston davlat akademik katta teatri sahnalashtiruvchi rejissori Slonim Andrey Yevseyevich “O‘zbekiston Respublikasi san’at arbobi”, Mirzo Ulug‘bek nomidagi O‘zbekiston Milliy universitetining “Fotonika” kafedrasi professori Valiyev Uyg‘un Vohidovich “O‘zbekiston Respublikasi fan arbobi”, boks bo‘yicha O‘zbekiston milliy terma jamoasi a’zolari G‘oibnazarov Fazliddin Hasanboyevich, G‘iyosov Shaxram Jamshidovich, Do‘smatov Hasanboy Ma’rufjon o‘g‘li, Zoirov Shahobiddin Shokirovich, Meliqo‘ziyev Bektemir Ro‘zmatjon o‘g‘li “O‘zbekiston iftixori” faxriy unvonlari va ordenlar bilan taqdirlandi. Rio Olimpiadasi g‘olibi, og‘ir atletika bo‘yicha O‘zbekiston milliy terma jamoasi a’zosi Nurudinov Ruslan Shamilevich hamda dzyudo bo‘yicha O‘zbekiston milliy terma jamoasi a’zosi Sobirov Rishod Rashidovich “El-yurt hurmati” ordeni bilan taqdirlanadigan bo‘ldi.
O‘zbek Milliy akademik drama teatri aktyorlari Ashurova Zuhra Jo‘rayevna, Zokirova Gavhar Akmalovna hamda Berdaq nomidagi Qoraqalpoq davlat musiqali teatri bosh baletmeysteri Sharipov Abibulla Nagmetovich “O‘zbekiston Respublikasi xalq artisti”, Surxondaryo viloyati Sherobod tumani madaniyat va aholi dam olish markazi mutaxassisi, baxshi Xo‘jamberdiyev Shodmon Egamberdiyevich “O‘zbekiston Respublikasi xalq baxshisi”, “Tafakkur” jurnali bosh muharriri A’zamov Erkin Normamatovich “O‘zbekiston Respublikasi xalq yozuvchisi” unvonlariga sazovor bo‘ldi.
Bundan tashqari, bir qator fan, madaniyat, sport, OAV va jamoat arboblari “O‘zbekiston Respublikasi xalq ustasi”, “O‘zbekiston Respublikasi xalq shoiri”, “O‘zbekiston Respublikasi xalq o‘qituvchisi”, “O‘zbekiston Respublikasida xizmat ko‘rsatgan artist”, “O‘zbekiston Respublikasida xizmat ko‘rsatgan yoshlar murabbiyi”, “O‘zbekiston Respublikasida xizmat ko‘rsatgan jurnalist”, “O‘zbekiston Respublikasida xizmat ko‘rsatgan madaniyat xodimi”, “O‘zbekiston Respublikasida xizmat ko‘rsatgan sog‘liqni saqlash xodimi”, “O‘zbekiston Respublikasida xizmat ko‘rsatgan sport ustozi”, “O‘zbekiston Respublikasida xizmat ko‘rsatgan sportchi” unvonlari bilan, “El-yurt hurmati”, “Fidokorona xizmatlari uchun”, “Mehnat shuhrati” ordenlari bilan taqdirlandi.
Mamlakatda har tomonlama sog‘lom va barkamol avlodni voyaga yetkazish ishiga qo‘shgan katta hissasi hamda yoshlarni Vatanga muhabbat, istiqlol g‘oyalariga sadoqat, sog‘lom turmush tarzi tamoyillari ruhida tarbiyalashdagi xizmatlari uchun bir qator shaxslar II darajali “Sog‘lom avlod uchun” va “Do‘stlik” ordeni bilan mukofotlandi.
Shuningdek, mamlakatda amalga oshirilayotgan ma’naviy-ma’rifiy va ijtimoiy islohotlardagi faol ishtirok etgan, samarali mehnat qilgan, yosh avlodni Vatanga muhabbat, milliy va umuminsoniy qadriyatlarga hurmat ruhida tarbiyalash ishiga hissa qo‘shgan arboblar “Shuhrat” medali bilan taqdirlandi.
Farmonning to‘liq matni matbuotda e’lon qilinadi.
Izoh (0)