Ўзбекистон Республикаси Президенти «Ўзбекистон Мустақиллигининг йигирма беш йиллиги муносабати билан фан, таълим, соғлиқни сақлаш, адабиёт, маданият, санъат, маънавият ва маърифат, оммавий ахборот воситалари ҳамда ижтимоий соҳалар ходимларидан бир гуруҳини мукофотлаш тўғрисида»ги фармонни имзолади. Ҳужжат матнини ЎзА келтирди.
«Ватанимиз мустақиллигини мустаҳкамлаш, миллий ғояни ривожлантириш, маънавиятимизни тиклаш, ўзлигимизни англаш йўлида катта ҳисса қўшган, ёрқин истеъдоди ва ижоди, илмий фаолияти, ҳалол хизмати, ёшларни она юртга муҳаббат, истиқлол ғояларига садоқат руҳида соғлом ва баркамол этиб тарбиялаш ҳамда жамоат ишларидаги фаол иштироки учун қуйидагилар фахрий унвонлар ва орденлар билан тақдирлансин», — дейилади фармонда.
Унга кўра, Камолиддин Беҳзод номидаги Миллий рассомлик ва дизайн институти доценти, рангтасвирчи рассом Фахриддинов Зайниддин Рамзиевич ҳамда Алишер Навоий номидаги Ўзбекистон давлат академик катта театри саҳналаштирувчи режиссёри Слоним Андрей Евсеевич «Ўзбекистон Республикаси санъат арбоби», Мирзо Улуғбек номидаги Ўзбекистон Миллий университетининг «Фотоника» кафедраси профессори Валиев Уйғун Воҳидович «Ўзбекистон Республикаси фан арбоби», бокс бўйича Ўзбекистон миллий терма жамоаси аъзолари Ғоибназаров Фазлиддин Ҳасанбоевич, Ғиёсов Шахрам Жамшидович, Дўсматов Ҳасанбой Маъруфжон ўғли, Зоиров Шаҳобиддин Шокирович, Мелиқўзиев Бектемир Рўзматжон ўғли «Ўзбекистон ифтихори» фахрий унвонлари ва орденлар билан тақдирланди. Рио Олимпиадаси ғолиби, оғир атлетика бўйича Ўзбекистон миллий терма жамоаси аъзоси Нурудинов Руслан Шамилевич ҳамда дзюдо бўйича Ўзбекистон миллий терма жамоаси аъзоси Собиров Ришод Рашидович «Эл-юрт ҳурмати» ордени билан тақдирланадиган бўлди.
Ўзбек Миллий академик драма театри актёрлари Ашурова Зуҳра Жўраевна, Зокирова Гавҳар Акмаловна ҳамда Бердақ номидаги Қорақалпоқ давлат мусиқали театри бош балетмейстери Шарипов Абибулла Нагметович «Ўзбекистон Республикаси халқ артисти», Сурхондарё вилояти Шеробод тумани маданият ва аҳоли дам олиш маркази мутахассиси, бахши Хўжамбердиев Шодмон Эгамбердиевич «Ўзбекистон Республикаси халқ бахшиси», «Тафаккур» журнали бош муҳаррири Аъзамов Эркин Нормаматович «Ўзбекистон Республикаси халқ ёзувчиси» унвонларига сазовор бўлди.
Бундан ташқари, бир қатор фан, маданият, спорт, ОАВ ва жамоат арбоблари «Ўзбекистон Республикаси халқ устаси», «Ўзбекистон Республикаси халқ шоири», «Ўзбекистон Республикаси халқ ўқитувчиси», «Ўзбекистон Республикасида хизмат кўрсатган артист», «Ўзбекистон Республикасида хизмат кўрсатган ёшлар мураббийи», «Ўзбекистон Республикасида хизмат кўрсатган журналист», «Ўзбекистон Республикасида хизмат кўрсатган маданият ходими», «Ўзбекистон Республикасида хизмат кўрсатган соғлиқни сақлаш ходими», «Ўзбекистон Республикасида хизмат кўрсатган спорт устози», «Ўзбекистон Республикасида хизмат кўрсатган спортчи» унвонлари билан, «Эл-юрт ҳурмати», «Фидокорона хизматлари учун», «Меҳнат шуҳрати» орденлари билан тақдирланди.
Мамлакатда ҳар томонлама соғлом ва баркамол авлодни вояга етказиш ишига қўшган катта ҳиссаси ҳамда ёшларни Ватанга муҳаббат, истиқлол ғояларига садоқат, соғлом турмуш тарзи тамойиллари руҳида тарбиялашдаги хизматлари учун бир қатор шахслар II даражали «Соғлом авлод учун» ва «Дўстлик» ордени билан мукофотланди.
Шунингдек, мамлакатда амалга оширилаётган маънавий-маърифий ва ижтимоий ислоҳотлардаги фаол иштирок этган, самарали меҳнат қилган, ёш авлодни Ватанга муҳаббат, миллий ва умуминсоний қадриятларга ҳурмат руҳида тарбиялаш ишига ҳисса қўшган арбоблар «Шуҳрат» медали билан тақдирланди.
Фармоннинг тўлиқ матни матбуотда эълон қилинади.
Изоҳ (0)