Boks. Hasanboy Do‘stmatov finalda! Eng kamida kumush medal naqd qilindi, oltin uchun harakat davom etadi

O‘zbekistonlik bokschi Hasanboy Do‘stmatov Rio—2016 Olimpiadasidagi uchinchi jangini amerikalik Niko Ernandesga qarshi o‘tkazdi.

Yarim final bosqichadan o‘rin olgan jangning birinchi raundi o‘zbekistonlik sportchi foydasiga hal bo‘ldi. Ikkinchi raundda ham Hasanboy Do‘stmatov o‘z kuchini ko‘rsatib, raqibiga imkoniyat qoldirmadi. Shundan so‘ng uchinchi raundning o‘tkazilishi amerikalik bokschining kichik jarohati sabab so‘roq ostida qoldi.

Bir amallab uchinchi raundga chiqqan Niko Ernandes baribir jangni o‘z foydasiga hal qila olmay, bronza medali bilan cheklandi.

Bu g‘alaba o‘zbekistonlik bokschini finalga olib chiqdi. Bunga qadar ikki nafar dzyudo ustasi mamlakat delegatsiyasiga bronza medalini taqdim etgan bo‘lsa, bokschi Hasanboy Do‘stmatov minimum kumush medalni naqd qildi. Final jangidagi g‘alaba unga Rio—2016 oltin medallarini taqdim etishi mumkin.

Hasanboy Do‘stmatov 49 kilogramm vazn toifasigacha bo‘lgan sportchilar o‘rtasidagi musobaqaning 1/8 finalida meksikalik Xoselito Velaskesni, ¼ finalda qozog‘istonlik Birjan Jakipovni mag‘lub etishga muvaffaq bo‘lgandi.