Rio—2016 Olimpiadasida 66 kilogramm vazn toifasida gilamga chiqqan o‘zbekistonlik dzyudochi Rishod Sobirov bronza medalni qo‘lga kiritdi. Jurnalist Feruz Muhammad ketma-ket uchinchi Olimpiadada bronza medal sohibiga aylangan sportchi bilan bog‘landi.
— Chorak finalda janubiy koreyalik An Baulga imkoniyatni boy berganingizda, xayolingizdan nimalar o‘tdi?— Yildan yilga, musobaqadan musobaqadan tajriba, mahorat oshib boraverar ekan. Joriy Olimpiadaga tayyorgarligimiz har doimgidan ham kuchliroq bo‘lgan edi. Chorak finaldagi mag‘lubiyat... Xayolimdan juda ko‘p narsalar o‘tdi. Muxlislarimiz, menga ishonib, mendan g‘alaba kutgan insonlar, yurtdoshlarimiz oldidagi mas’uliyat — bu haqda ko‘p gapirish mumkin. O‘sha lahzada imkoniyatni boy bergan bo‘lsam-da, alohida ta’kidlashni istardim, oxir-oqibat medal olishimga ishongan edim.
— Olimpiada o‘yinlarida debyut qilgan vaqtingiz 22 yoshda edingiz. Keyinchalik Londondagi O‘yinlarda ham qatnashib, uchinchi o‘rinni egalladingiz. Rioda ham bronza. Shu uchala medaldan qay birini qo‘lga kiritish qiyinroq, og‘irroq bo‘lgan?— Sportda oson bahslarning o‘zi yo‘q — har bir jang, kurashning har bir bosqichi o‘ziga yarasha og‘ir, murakkab bo‘ladi. Nisbatan olib qaraganda, Pekin va Riodan ko‘ra London Olimpiadasi eng qiyini bo‘lgan edi.
— Olimpiada o‘yinlarida sizga duch kelgan dzyudochilar orasida, sizningcha, eng kuchlisi qaysi?— Olimpiadada jahonning eng kuchli sportchilari ishtirok etadi, shunday ekan, bu yerda oson yo kuchsiz raqib degan tushuncha yo‘q — raqiblarning bari kuchli, bari hurmatga loyiq. Lekin bu yil meni Olimpiada oltini uchun kurashdan chiqarib yuborgan janubiy koreyalik yosh dzyudochi — An Baul menga shu vaqtgacha duch kelgan raqiblar orasida eng kuchlisi bo‘lsa kerak.
— Uchta Olimpiada va uchta medal — shunga o‘xshash ko‘rsatkich bo‘yicha o‘zbekistonlik sportchilar orasida faqat Artur Taymazov sizdan oldinda, u to‘rtta Olimpiadada qatnashib, to‘rtta medal qo‘lga kiritgan. Keyingi maqsadlaringiz qanday — Olimpiada oltinini qo‘lga kiritmaguncha, kurashda davom etasizmi yoki faoliyatingizni yakunlab, avval aytganingizdek, murabbiy sifatida yangi chempionlarni tayyorlashga kirishasizmi?— Hali bu haqda chuqur o‘ylab ko‘rganim yo‘q. Hozir faqat bir narsani aniq aytishim mumkin — Olimpiada oltin medalini qo‘lga kiritmaguncha tinim bilmay mehnat qilishda davom etaman. Keyingi Olimpiada o‘yinlari uchun eng asosiy maqsadim — oltin medal.
— Sizni qo‘llab turgan muxlislar, yurtdoshlarimizga qanday dil so‘zlaringiz bor?— Hozirgi va avvalgi yutuqlarning zamirida meni qo‘llab-quvvatlagan yurtdoshlarimizning ishonchi yotibdi. Ularning ishonchini to‘la oqlashim uchun Rioda oltin medalni qo‘lga kiritishim shart edi, afsuski iloji bo‘lmadi. Ularning ishonchini oqlash uchun tinimsiz mehnat qilishda davom etaman. Muxlislarimizga katta rahmat, barchalari sog‘-omon bo‘lishsin!
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)