Rossiya va Turkiya prezidentlari Vladimir Putin va Rajab Toyyib Erdo‘g‘onning delegatsiyalar ishtirokidagi kengaytirilgan uchrashuvida Rossiyaning Turkiya harbiylari tomonidan urib tushirilgan Su-24 samolyoti uchun badal pulining to‘lanishi masalasi muhokama qilinmadi. Bu haqda, Rossiya iqtisodiy rivojlanish vaziri Aleksey Ulyukayevga asoslanib, “Interfaks” xabar bermoqda.
Ilgariroq xabar qilinganidek, davlat rahbarlarining yuzma-yuz uchrashuvi ikki soat davom etdi. Shundan so‘ng ularga delegatsiyalar a’zolari qo‘shildi. Rossiya delegatsiyasi tarkibida bo‘lgan Ulyukayev uchrashuv yakunlariga ko‘ra o‘tkazilgan matbuot anjumanida mazkur masala ko‘tarilmaganini ta’kidlab o‘tdi.
“Men kengaytirilgan tarkibda ishtirok etgan yig‘ilishda bu masala ko‘tarilmadi”, — dedi u.
Ilgariroq Putinning yordamchisi Yuriy Ushakov uchrashuvda mazkur masala muhokama qilinishini aytgan edi.
Izoh (0)