Vyetnam terma jamoasi Toshkent mezbonlik qilgan Osiyo Chempionatiga tashrif buyurayotganida, Jahon Chempionati chiptasi uchun kurashishi kerak bo‘lgan to‘rt mamlakat deb Yaponiya, Eron, Tailand va mezbonlar hisoblanayotgandi.
Yuqorida nomlari keltirilgan mamlakatlardan tashqari Avstraliya, Iroq, Qirg‘iziston kabi teng kuchli jamoalar ham bor edi. Biroq shunday nomlar ichidan vyetnamliklar yorib chiqa olishdi.
Kolumbiyaga yo‘l
Vyetnam terma jamoasining Jahon Chempionatiga qadar yetib kelishi fantastikadan boshqa narsa emas. Haqiqatda esa shunday bo‘lib chiqdi.O‘zbekiston mezbonlik qiladigan Osiyo Chempionatlari o‘zining noan’anaviy tomonlari bilan ajralib turadi. Masalan 2006-yil Toshkentdagi qit’a chempionatida Eron gegemonligiga chek qo‘yilgandi. Oradan 10 yil o‘tib esa Vyetnamning mundial chiptasiga ega chiqishi ko‘pchilikni xayron qoldirdi.
Hammasi “C” guruhidagi yurishdan boshlandi. Birinchi o‘yinda Xitoy Taypeyi terma jamoasi 5:4 hisobi bilan mag‘lub etildi. Ikkinchi o‘yinda esa tojikistonlik futzalchilar tor-mor keltirildi — 8:1. Bu g‘alabalar Vyetnamni guruhdan olib chiqib bo‘lgandi. 3-turda esa qit’aning eng kuchli termalaridan biri bo‘lmish Tailand dovonidan o‘tib bo‘lmadi — 1:3.
Chorak finalni Vyetnam termasi a’zolari hech qachon unutishmaydi. Yaponiyaning oson g‘alabasi tahmin qilingan o‘yin 4:4 hisobi bilan yakuniga yetdi. Shuning o‘ziyoq fantastika edi. Qo‘shimcha daqiqalarda ham kunchiqar yurt futzalchilari vaziyatni o‘nglay olmadi. Penaltilar seriyasida omad Vyetnamga kulib boqdi — 2:1. Jamoa Jahon Chempionatida.
Yarim final bellashuvi Vyetnamning haqiqiy saviyasini ko‘rsatdi deya olmaymiz, chunki raqib Eron edi — 1:13. 3-o‘rin uchun bellashuvga ham vyetnamliklar jiddiy e’tiborda bo‘lishmadi, ular mundial eyforiyasi bilan yurishgandi — Vyetnam — Tailand 0:8.
Jamoa haqida
Vyetnam terma jamoasining Toshkentdagi muvaffaqiyatida jamoa futbolchilari o‘rtasidagi o‘zaro tushunuvchanlik yotibdi deyish mumkin. Jamoaning 11 a’zosi, ya’ni, uchdan ikki qismi Vyetnamning to‘rt karra chempioni hisoblangan “Thai Son Nam” safida to‘p suradi. Tabiiyki, bir necha yildan buyon birga harakat qiladigan yigitlar bir-birini yaxshi tushunadi.
Qiziq tomoni, ispaniyalik bosh murabbiy Garsiya ham o‘sha klub murabbiyi hisoblanadi. U ham Vyetnam chempionatida faol, bir vaqtning o‘zida esa terma jamoani ham shakllantiradi. Bitta o‘q bilan ikkita quyonni urishga o‘xshash holat. Vyetnam terma jamoasini shakllantirish uchun “Thai Son Nam” klubi baza sifatida tanlab olingandek.
Tran Van Vu jamoaning to‘purar futbolchisi hisoblanadi. Uning harakatlari Osiyo Chempionatida o‘z samarasini berdi. Yaponiya darvozasiga ikkita gol urganiyoq qanday darajadagi futzalchi ekanini ko‘rsatishi mumkin. Shuningdek, Vetnam chempionining klublar o‘rtasidagi Osiyo Chempionatida 3-o‘rinni qo‘lga kiritishida ham bu futbolchi benazir bo‘lgandi.
Vyetnam terma jamoasining mundialdagi ishtiroklari haqida yozish shart emas. Chunki ular O‘zbekiston singari Jahon Chempionatida ilk bor ishtirok etmoqda.
Izoh (0)