Paulu Barboza: Ronaldu maydondaligida jamoaga o‘zini namoyon qilish imkoniyatini bermaydi

Rossiyaning “Sport-Ekspress” nashri muxbiri Sergey Yegorov Portugaliya terma jamoasi Yevropa Chempionatida g‘olib chiqqanidan so‘ng buning qanday sodir bo‘lgani va katta muvaffaqiyat zamirida nimalar yotganini bilish maqsadida Paulu Barboza bilan suhbat uyushtirdi.

Portugaliyalik mashhur futbol agentining o‘ziga berilgan savollarga javobidan qandaydir yangilik olishning imkoni yo‘qdir. Biroq suxbat ayni ko‘rinishda taqdim etilganida Barbozaning fikrlari va Portugaliya terma jamoasining ichki muhitidagi holati yorqinroq ko‘ringandek bo‘ladi.

Portugaliyaliklar Krishtianusiz ham zafar quchishlari mumkinligini isbotlashdi

— Portugaliya nashrlarining yuziga e’tibor qilib, bosh murabbiy Fernandu Santushning kamtarin nigohlarini ko‘rdim. Bu terma jamoada asosiy odam umuman boshqa ekanligidan dalolat emasmi?— Fikringizga qo‘shilmayman. Hammasi aksincha. Yevroning haqiqiy qahramonini izlayotgan bo‘lsangiz bu aynan Santush. Murabbiy yaxshi futbolchilar jamlanmasidan buyuk jamoaga asos sola oldi, bunaqasi kam uchraydi. Santush bor haqiqatni ochiq-oydin aytib, faqatgina chiroyli futbolni emas, natijani ko‘zlayotganini tushuntira oldi. Finalda shunday bo‘ldi, 90 daqiqa Portugaliyaning o‘yini chiqmadi va eng zo‘r futbolchi darvozabon bo‘ldi.

— Qo‘shimcha daqiqalarda nima yuz berdi?— Ikkita sababni keltirib o‘taman. Finalgacha bir kun ko‘proq dam olganimiz katta yordam berdi. Shuning uchun ham qo‘shimcha taymlarda o‘zimizni yaxshiroq ko‘rsatdik. Boshqa tomondan terma jamoa Ronaldusiz o‘ynay olishini tushundi. Qolaversa, Fransiya termasi o‘z imkoniyati darajasida o‘ynay olmadi. Ular bizni jiddiy qabul ham qilishmadi.

— Ronalduning futbolchilarga ko‘rsatma berib turishi shunchaki oliftagarchilikmi yoki chindan ham hal qiluvchi ahamiyatga ega holatmi?— Bu faqat uning o‘zigagina kerakli bo‘lgan shou. Terma jamoaning o‘z murabbiyi bor, xo‘jako‘rsinlikka ne hojat? Sen kimligingni maydonda ko‘rsat! E’tibor bering, Krishtianu jarohatidan keyin yechinish xonasida o‘tirdi. O‘yin oxiriga kelibgina maydon chetida ko‘rsatma berishni boshladi. Xuddiki, murabbiy emas, u asosiydek. Ochig‘i o‘sha paytda Santushga oson bo‘lmadi.

Ronaldu maydonda vaqti jamoa o‘tmaslashib qoladi

— Ronaldu jarohat olgan vaziyatda fol bormidi?— Yo‘q. Bu bizda keng muhokama qilinmoqda. Payet to‘p uchun o‘ynadi, Krishtianuni sindirish uchun emas. Ha, Portugaliyada Payet Ronalduga qasddan jarohat yetkazishga harakat qildi deb hisoblaydigan ekstremistlar ham bor. Biroq jiddiy odamlar buni shunchaki tasodif deya qabul qildi.

— Yana nimalar deyishmoqda? Krishtianu o‘yinni davom ettirishi mumkinmidi?— U o‘zini o‘ng‘ay his eta olmagani rost. Krishtianu uchrashuvni davom ettirishni istaganiga hech qanday shubha yo‘q. Agar u almashtirishlarini so‘rasa, demak chindan ham o‘yinni davom ettira olmaydi. Hozir unga qiyin, chunki Portugaliya u ishtirok eta olmagan o‘yindan keyin chempionlikni qo‘lga kiritdi.

— Lekin siz bundan afsusda emassiz?— Men sizga butun bir turnir haqida hikoya qildim. Portugaliya umuman boshqacha o‘ynashi ham mumkin edi. Ronaldu jamoaga o‘zini namoyon qilish imkonini bermaydi. Krishtianu maydonda bo‘lganida hamma to‘plar uning uchun, jarima zarbasi berilsa, faqat u tepadi. Vaholanki finalda nimalar ro‘y berganiga qarang. Biz sal qolsa jarima zarbasidan hisobda oldinga chiqib olishimiz mumkin edi, Rafael Gerreyraning zarbasidan keyin to‘p darvoza to‘siniga tegib qoldi. Darvozadan biroz chaproq nuqta aynan uniki. Krishtianuga esa farqi yo‘q, qulaymi yoki noqulay — o‘zi tepadi.

— Shunda Ronalduning jarohati Portugaliya terma jamoasining foydasi uchun xizmat qilganmi?— Bunday deb bo‘lmaydi. Shunchaki biz boshqacha futbol namoyish qilishni boshladik. Ronaldusiz terma jamoa yanada serqirraroq. U bor paytda esa futbolchilar o‘tmaslashib qoladi. Men Ronaldu maydonga chiqmasligi kerak demoqchi emasman. Lekin hamma narsa birgina uning o‘ziga bog‘liq bo‘lib qolmasligi kerak.

— O‘tmaslashib qoladi deganingizni tushunish qiyin...— Balki Rossiyada buni tushunishmas. Qanday qilib dunyoning eng kuchli futbolchilaridan birini tanqid qilish mumkin? Lekin shunday qilmasangiz, inson dohiylikka qarab ketib qoladi. Futbol bir joyda turib qolishi kerak emas. Final Ronaldusiz ham sovrin yutishi mumkin bo‘lgan jamoa borligini ko‘rsatib berdi.

Santush boshidanoq jamoada finaldan keyingina uyga qaytishini uqtirgandi

— Santushning xizmati qanday namoyon bo‘ldi?— Yevro—2016 dagi g‘alaba mo‘jiza emas. Hal qiluvchi pallalarda biz kuchlilik qildik, chunki jismoniy tomondan musobaqaga tayyor edik. Bizda ajoyib himoya bor edi. Qariyalar yig‘ilib qolgani, Rikardu Karvalyuning 38 yoshda ekani haqida ko‘p yozishdi. Ammo vengerlarga qarshi o‘yin aytmaganda, biz juda kam gol o‘tkazib yubordik.

— Rossiya terma jamoasi o‘tgan yilning noyabrida Portugaliyani mag‘lub etgani yodingizdami? Bundan kelib chiqadiki biz ham chempion bo‘lishimiz mumkin edi...— Ha, agar siz shunday hisoblasangiz. Rossiyada iqtidorlar bor, biroq jamoa yo‘q. Men yaxlit kollektivni nazarda tutmoqdaman. O‘ylashimcha bu eng keraklisi. Shuningdek sizning yigitlar ularga chindan ham ishonayotganliklarini his qilishmaydi.

— Portugaliyaliklarda shunday ishonch bormi?— Ha. Santush Yevrodan oldin shunday degandi: biz uyga finaldan keyin qaytib kelamiz, Fransiyaga g‘alaba uchun ketyapmiz. Murabbiy shunchaki o‘ylagani uchun fikr bildirmadi, u jamoani shunga ishonishga majbur qila oldi.

— Ronaldu haqida yana bitta savol: u Portugaliya futboli tarixidagi eng yaxshi futbolchimi?— Yo‘q. Uni qanday qilib Eysebio bilan solishtirish mumkin? Krishtianu buyuk futbolchi, Eysebio esa afsona. Ronaldu Eysebiodan hech qanaqasiga kuchli emas.