Россиянинг «Спорт-Экспресс» нашри мухбири Сергей Егоров Португалия терма жамоаси Европа Чемпионатида ғолиб чиққанидан сўнг бунинг қандай содир бўлгани ва катта муваффақият замирида нималар ётганини билиш мақсадида Паулу Барбоза билан суҳбат уюштирди.
Португалияликлар Криштианусиз ҳам зафар қучишлари мумкинлигини исботлашди
— Португалия нашрларининг юзига эътибор қилиб, бош мураббий Фернанду Сантушнинг камтарин нигоҳларини кўрдим. Бу терма жамоада асосий одам умуман бошқа эканлигидан далолат эмасми?— Фикрингизга қўшилмайман. Ҳаммаси аксинча. Евронинг ҳақиқий қаҳрамонини излаётган бўлсангиз бу айнан Сантуш. Мураббий яхши футболчилар жамланмасидан буюк жамоага асос сола олди, бунақаси кам учрайди. Сантуш бор ҳақиқатни очиқ-ойдин айтиб, фақатгина чиройли футболни эмас, натижани кўзлаётганини тушунтира олди. Финалда шундай бўлди, 90 дақиқа Португалиянинг ўйини чиқмади ва энг зўр футболчи дарвозабон бўлди.
— Қўшимча дақиқаларда нима юз берди?— Иккита сабабни келтириб ўтаман. Финалгача бир кун кўпроқ дам олганимиз катта ёрдам берди. Шунинг учун ҳам қўшимча таймларда ўзимизни яхшироқ кўрсатдик. Бошқа томондан терма жамоа Роналдусиз ўйнай олишини тушунди. Қолаверса, Франция термаси ўз имконияти даражасида ўйнай олмади. Улар бизни жиддий қабул ҳам қилишмади.
— Роналдунинг футболчиларга кўрсатма бериб туриши шунчаки олифтагарчиликми ёки чиндан ҳам ҳал қилувчи аҳамиятга эга ҳолатми?— Бу фақат унинг ўзигагина керакли бўлган шоу. Терма жамоанинг ўз мураббийи бор, хўжакўрсинликка не ҳожат? Сен кимлигингни майдонда кўрсат! Эътибор беринг, Криштиану жароҳатидан кейин ечиниш хонасида ўтирди. Ўйин охирига келибгина майдон четида кўрсатма беришни бошлади. Худдики, мураббий эмас, у асосийдек. Очиғи ўша пайтда Сантушга осон бўлмади.
Роналду майдонда вақти жамоа ўтмаслашиб қолади
— Роналду жароҳат олган вазиятда фол бормиди?— Йўқ. Бу бизда кенг муҳокама қилинмоқда. Пайет тўп учун ўйнади, Криштиануни синдириш учун эмас. Ҳа, Португалияда Пайет Роналдуга қасддан жароҳат етказишга ҳаракат қилди деб ҳисоблайдиган экстремистлар ҳам бор. Бироқ жиддий одамлар буни шунчаки тасодиф дея қабул қилди.
— Яна нималар дейишмоқда? Криштиану ўйинни давом эттириши мумкинмиди?— У ўзини ўнғай ҳис эта олмагани рост. Криштиану учрашувни давом эттиришни истаганига ҳеч қандай шубҳа йўқ. Агар у алмаштиришларини сўраса, демак чиндан ҳам ўйинни давом эттира олмайди. Ҳозир унга қийин, чунки Португалия у иштирок эта олмаган ўйиндан кейин чемпионликни қўлга киритди.
— Лекин сиз бундан афсусда эмассиз?— Мен сизга бутун бир турнир ҳақида ҳикоя қилдим. Португалия умуман бошқача ўйнаши ҳам мумкин эди. Роналду жамоага ўзини намоён қилиш имконини бермайди. Криштиану майдонда бўлганида ҳамма тўплар унинг учун, жарима зарбаси берилса, фақат у тепади. Ваҳоланки финалда нималар рўй берганига қаранг. Биз сал қолса жарима зарбасидан ҳисобда олдинга чиқиб олишимиз мумкин эди, Рафаэль Геррейранинг зарбасидан кейин тўп дарвоза тўсинига тегиб қолди. Дарвозадан бироз чапроқ нуқта айнан уники. Криштиануга эса фарқи йўқ, қулайми ёки ноқулай — ўзи тепади.
— Шунда Роналдунинг жароҳати Португалия терма жамоасининг фойдаси учун хизмат қилганми?— Бундай деб бўлмайди. Шунчаки биз бошқача футбол намойиш қилишни бошладик. Роналдусиз терма жамоа янада серқиррароқ. У бор пайтда эса футболчилар ўтмаслашиб қолади. Мен Роналду майдонга чиқмаслиги керак демоқчи эмасман. Лекин ҳамма нарса биргина унинг ўзига боғлиқ бўлиб қолмаслиги керак.
Сантуш бошиданоқ жамоада финалдан кейингина уйга қайтишини уқтирганди
— Сантушнинг хизмати қандай намоён бўлди?— Евро—2016 даги ғалаба мўъжиза эмас. Ҳал қилувчи паллаларда биз кучлилик қилдик, чунки жисмоний томондан мусобақага тайёр эдик. Бизда ажойиб ҳимоя бор эди. Қариялар йиғилиб қолгани, Рикарду Карвалюнинг 38 ёшда экани ҳақида кўп ёзишди. Аммо венгерларга қарши ўйин айтмаганда, биз жуда кам гол ўтказиб юбордик.
— Россия терма жамоаси ўтган йилнинг ноябрида Португалияни мағлуб этгани ёдингиздами? Бундан келиб чиқадики биз ҳам чемпион бўлишимиз мумкин эди...— Ҳа, агар сиз шундай ҳисобласангиз. Россияда иқтидорлар бор, бироқ жамоа йўқ. Мен яхлит коллективни назарда тутмоқдаман. Ўйлашимча бу энг кераклиси. Шунингдек сизнинг йигитлар уларга чиндан ҳам ишонаётганликларини ҳис қилишмайди.
— Португалияликларда шундай ишонч борми?— Ҳа. Сантуш Евродан олдин шундай деганди: биз уйга финалдан кейин қайтиб келамиз, Францияга ғалаба учун кетяпмиз. Мураббий шунчаки ўйлагани учун фикр билдирмади, у жамоани шунга ишонишга мажбур қила олди.
— Роналду ҳақида яна битта савол: у Португалия футболи тарихидаги энг яхши футболчими?— Йўқ. Уни қандай қилиб Эйсебио билан солиштириш мумкин? Криштиану буюк футболчи, Эйсебио эса афсона. Роналду Эйсебиодан ҳеч қанақасига кучли эмас.
Изоҳ (0)