Тошкентда HTC 10 салкам 5 миллион сўмдан таклиф этилмоқда

Ўзбекистонда Тайвань етакчи смартфонлар ишлаб чиқарувчисининг охирги янгилиги — HTC 10 модели сотуви бошланди. Қурилма юқори аниқликдаги экран, кучли процессор ва мустаҳкам ҳимояланган металл корпус билан жиҳозланган. Анъанага кўра, ишлаб чиқарувчи камера ва товушга алоҳида эътибор берган, дея хабар қилади «Mobinfo.uz».

Асосий 12 мегапикселли камера UltraPixel технологиясида бажарилган ва лазер автофокус билан жиҳозланган. Унинг ишга туширилиши учун атиги 0,6 сония талаб этилади. Шунингдек, Canon ва Nikon профессионал фотокамералари каби RAW шаклида фото олиш мумкин.

HTC 10 16 битлидан 24 битли аудиога, шунингдек, рақамлидан аналогли форматга конвертация имкониятига эга биринчи смартфон бўлди. Динамиклар BoomSound технологиясида бажарилган ва телефоннинг юқори ҳамда пастки қисмларида жойлашган. Super LCD технологияси бўйича тайёрланган дисплей HTC M9 га нисбатан 30 фоизга ёрқинроқ ва 50 фоизга таъсирчанроқ.

Смартфон кундалик эскириш, эҳтимолий қулаш ва зарбаларга чидамли қилиб тайёрланган. Синовлар -20 дан +60 даражагача бўлган фавқулодда ҳароратларда бўлиб ўтган, қурилма 10 минг маротаба турли юзаларга ташлаб юборилган, эгилиш, тирналиш ва коррозияга бардошлилик бўйича синалган.

HTC 10 Тошкентда 4,9 миллион сўмдан таклиф этилмоқда. Таққослаш учун, бу пулга ҳатто iPhone 6S Plus сотиб олиш мумкин.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.