Shotlandiya va Shimoliy Irlandiya aholisi Buyuk Britaniyaning Yevroittifoq tarkibidagi taqdiri haqidagi referendumda hamjamiyatdan chiqishga qarshi ovoz berdi, deb yozadi “RBK”.
Shotlandiyadagi ovoz berish natijalari hisoblab chiqilgach, Buyuk Britaniyaning ushbu qismidagi barcha saylov okruglari Yevroittifoqqa a’zolikni saqlab qolishni yoqlab ovoz bergani ma’lum bo‘ldi. Edinburgda Brexit’ga qarshi saylovchilarning 74,4 foizi, Glazgoda — 66,6 foizi, Aberdinda — 61,1 foizi ovoz berdi. Shotlandiyada jami 1,66 million kishi Yevroittifoqni yoqlab, 1,01 millioni esa qarshi ovoz berdi.
Shimoliy Irlandiyada ham saylovchilarning ko‘pchiligi Brexit’ga qarshi ovoz berdi, ammo hudud ikki qismga bo‘lindi. Irlandiya respublikasi bilan chegaradosh bo‘lgan janubiy qism Buyuk Britaniya Yevroittifoqqa a’zolikni saqlab qolishi uchun ovoz berdi, unionistlar pozitsiyasi kuchli bo‘lgan shimoliy qism esa Brexit’ni yoqlab chiqdi.
Avvalroq BBC teleradiokorporatsiyasi Birlashgan Qirollik Yevroittifoqdan chiqishini prognoz qilgandi.
Izoh (0)