Xitoyning yetakchi savdo maydonchalaridagi holat Britaniyadagi referendumning u yoki bu shahardagi natijalariga bog‘liq bo‘lib qoldi, deya xabar bermoqda “RBK”.
Xitoyning ikkita asosiy fond bozori — Gongkong va Shanxaydagi indekslar Britaniyaning Yevroittifoqdan chiqishi haqidagi referendum yakunlarining bir-biriga zid xabarlari ostida bir kun avvalgi darajada saqlanib turibdi. Bozorlardagi harakat Buyuk Britaniyadan kelayotgan axborot sabab o‘zgarib turibdi.
Xususan, Xitoydagi savdolarning ochilishi Britaniyaning Yevroittifoqdan chiqishi haqidagi mahalliy saylov komissiyalari xabarlari e’lon qilingan vaqtda to‘g‘ri keldi. Shu sababli ham Gongkongdagi Hang Seng indeksi ham, Shanxaydagi SSE Composite ham savdolarning dastlabki daqiqalarida 0,4 foizga pasaydi. Keyinchalik Britaniyaning Yevroittifoqdan chiqishi tarafdorlari ishonch bilan oldinga o‘tib olgani ma’lum bo‘ldi.
Gongkong Britaniyaning sobiq mustamlakasi, shu bilan birga, jahon moliya markazi maqomi uchun kurashda Londonning raqobatchisi hisoblanadi. Xitoylik investorlarning Buyuk Britaniyadan kelayotgan axborotga ehtiyotkorlik bilan munosabatda bo‘lishini shu bilan izohlash mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)