Ramazonda niyat qilishning oxirgi vaqti qachon?

Foydalanuvchilardan biri “Islom.uz” saytida “Ramazonda niyat qilishning oxirgi vaqti qachon?” degan savol bilan murojaat etdi.

Sayt ma’muriyati bunga quyidagicha javob berdi: “Bu borada ulamolar turli fikrlar aytgan. Hanafiy ulamolar nazdida ro‘za ikki qismga bo‘linadi. Birinchisiga kechasidan niyat qilish shart emas, niyat qilib olsa afzal. Ramazon ro‘zasi, tayin qilingan nazrlari, nafl ro‘zalarni ado qilish kabi. Ikkinchisiga kechasidan niyat qilish shart. Yuqoridagi ro‘zalarning qazosi va boshqa barcha ro‘zalar kabi. Shuning uchun Ramazon ro‘zasini tutayotgan kishi kunning yarmi bo‘lishidan (shar’iy nisfun-nahorgacha) avval niyat qilib olsa, bu orada yeb-ichib qo‘ymagan bo‘lsa, ro‘za ro‘za bo‘laveradi.

Shar’iy nisfun-nahorni bilish uchun subhi sodiqdan quyosh botgunga qadar bo‘lgan vaqt ikkiga bo‘linadi. Agar kunning teng yarmidan ko‘prog‘ida niyat topilsa, ro‘za ro‘za bo‘ladi. Teng yarmida yoki teng yarmidan ozrog‘ida niyat topilsa ro‘za durust bo‘lmaydi”.