Android’dagi “VKontakte” foydalanuvchilarida izoh yozish chog‘ida kodirovka buzildi

6-iyun kuni kechki payt “VKontakte” ijtimoiy tarmog‘i foydalanuvchilari guruhlardagi postlarga izoh yozganda tushunarsiz belgilar paydo bo‘layotganidan noliy boshladi, deb yozadi TJournal. “VKontakte” muammo borligini tasdiqladi va uni bartaraf etish ustida ishlayotganini ma’lum qildi.

Chop etilayotgan izohlar matniga ko‘ra, muammo noto‘g‘ri kodirovkadan foydalanishdan iborat. Ruscha matn “VKontakte”da CP1251 kirill kodirovkada aks etadi, ammo “aynigan” izohlar uchun nimagadir UTF-8 ishlatilgan.

“VKontakte” matbuot kotibi Yevgeniy Krasnikovning aytishicha, dastlabki ma’lumotlarga ko‘ra, xatolik Android egalarining bir qismiga tegishli bo‘lgan. Nosozlik aynan nimadan iborat ekanligi va Android’ning qaysi versiyasiga ta’sir qilganligini tushuntirib bera olishmadi, ammo keyinroq bunga oydinlik kiritishga va’da berishdi.