Shveysariya fuqarolari, aftidan, hukumatning har bir kishiga oylik kafolatlangan daromad taqdim etish to‘g‘risidagi tashabbusini qo‘llab-quvvatlamaydi, deb yozmoqda “Interfaks”.
The Independent nashrining bildirishicha, o‘tkazilgan so‘rovlar fuqarolar orasida bu tashabbus qo‘llab-quvvatlanmayotganini ko‘rsatmoqda.
5-iyun, yakshanba kuni Shveysariyada aholiga har oy pul to‘lab borish yuzasidan referendum o‘tkaziladi. Referendum ishtirokchilari bitta savolga javob berishi lozim: har bir fuqaro, ishlash-ishlamasligidan qat’iy nazar, davlatdan oyiga 2500 Shveysariya franki (2260 yevro yoki 2530 dollar) olishi kerakmi? Bu summa har bir Shveysariya fuqarosiga, u qayerda yashashidan qat’iy nazar, umrbod to‘lab boriladi. 18 ga to‘lmagan fuqarolarga 625 frankdan to‘lab boriladi.
Agar tashabbus ma’qullansa, Shveysariya barcha fuqarolariga minimal daromad kafolatlangan birinchi davlatga aylanadi. Ammo, so‘rovlardan ma’lum bo‘lishicha, aholining 72 foizi ushbu tashabbusga qarshi ovoz berish niyatida.
Hukumatning hisob-kitoblariga qaraganda, bu rejani amalga oshirish uchun 25 million frank talab etiladi, bu esa budjetning boshqa bandlari qisqarishiga olib keladi.
Bundan tashqari, “Butunjahon bazaviy daromad tarmog‘i” tashkiloti vakili Gabriel Bartaning fikricha, tashabbusni joriy etishga kamida 10 yil vaqt talab etiladi.
Shveysariyaning Local nashriga bergan intervyusida ekspert bu ijtimoiy nafaqa uchun kurashlarni to‘xtatishini va umuman ko‘plab muammolarni hal qilishga ko‘mak berishini ta’kidlab o‘tdi. Tashabbus tanqidchilari, o‘z navbatida, bu odamlarni bekorchilikka undaydi, degan fikrda sobitdir.
Izoh (0)