Швейцария фуқаролари, афтидан, ҳукуматнинг ҳар бир кишига ойлик кафолатланган даромад тақдим этиш тўғрисидаги ташаббусини қўллаб-қувватламайди, деб ёзмоқда «Интерфакс».
The Independent нашрининг билдиришича, ўтказилган сўровлар фуқаролар орасида бу ташаббус қўллаб-қувватланмаётганини кўрсатмоқда.
5 июнь, якшанба куни Швейцарияда аҳолига ҳар ой пул тўлаб бориш юзасидан референдум ўтказилади. Референдум иштирокчилари битта саволга жавоб бериши лозим: ҳар бир фуқаро, ишлаш-ишламаслигидан қатъий назар, давлатдан ойига 2500 Швейцария франки (2260 евро ёки 2530 доллар) олиши керакми? Бу сумма ҳар бир Швейцария фуқаросига, у қаерда яшашидан қатъий назар, умрбод тўлаб борилади. 18 га тўлмаган фуқароларга 625 франкдан тўлаб борилади.
Агар ташаббус маъқулланса, Швейцария барча фуқароларига минимал даромад кафолатланган биринчи давлатга айланади. Аммо, сўровлардан маълум бўлишича, аҳолининг 72 фоизи ушбу ташаббусга қарши овоз бериш ниятида.
Ҳукуматнинг ҳисоб-китобларига қараганда, бу режани амалга ошириш учун 25 миллион франк талаб этилади, бу эса бюджетнинг бошқа бандлари қисқаришига олиб келади.
Бундан ташқари, «Бутунжаҳон базавий даромад тармоғи» ташкилоти вакили Габриэль Бартанинг фикрича, ташаббусни жорий этишга камида 10 йил вақт талаб этилади.
Швейцариянинг Local нашрига берган интервьюсида эксперт бу ижтимоий нафақа учун курашларни тўхтатишини ва умуман кўплаб муаммоларни ҳал қилишга кўмак беришини таъкидлаб ўтди. Ташаббус танқидчилари, ўз навбатида, бу одамларни бекорчиликка ундайди, деган фикрда собитдир.
Изоҳ (0)