Fizika-matematika fanlari nomzodi Dopler effektiga tayangan holda, mashinasining tezligi “KRIS-P” radari orqali to‘g‘ri o‘lchanganiga shubha bildirdi, deb yozadi TJournal.
Yuriy Goryunovning “Lada-Granta”si Tataristonda 2015-yil avgustida “KRIS-P” ko‘chma majmuasi obyektiviga tushgan edi. Kamera o‘lchovlariga ko‘ra, avtomobil soatiga 92 km tezlikda harakatlanib, belgilangan me’yordan 22 km/soatga oshgan. Buning uchun Qozon OTMlaridan birining o‘qituvchisi 500 rubl jarimaga tortilgan.
Goryunov uning spidometri tezlikni soatiga 80 kilometrdan ko‘p ko‘rsatmaganiga amin edi, shu tufayli u radar qanday ishlashini tushunib olishga qaror qildi.
Fizik fotoradar olgan suratlarni o‘rganib chiqayotib, uning datchigi o‘z avtomobilining tag qismidan pastroqda joylashganiga e’tibor qaratdi. “Fizik sifatida bunday sharoitlarda ushbu atmosfera qatlamida radioto‘lqinlar tarqalishi kamayishi va shu sababdan tezlik o‘lchovi natijalari oshirilgan bo‘lib chiqishi haqida xulosa qildim”, — dedi olim.
“KRIS-P” hujjatlarini o‘qib chiqqach esa, u fotoradar datchigining 25 darajali burchakdan ko‘ra pastroq daraja ostida o‘rnatilishi transport vositasi tezligini o‘lchash natijalari juda oshirib yuborilishiga olib kelishini aniqladi.
Radioto‘lqinlarning atmosferada tarqalishi, shuningdek, radar ishi asoslangan Dopler effekti (nurlanish manbasi va/yoki kuzatuvchining siljishi oqibatida kuzatuvchi tomonidan qabul qilinayotgan nurlanish to‘lqini chastotasi va uzunligining o‘zgarishi) haqidagi ma’lumotni Goryunov sudda himoya chog‘ida qo‘lladi.
Goryunov, oxir-oqibat, “KRIS-P” majmuasi o‘sha holatda noto‘g‘ri o‘rnatilganini, buning ustiga, uning yonida, ko‘rsatmada belgilangani kabi, Yo‘l harakati xavfsizligi davlat inspeksiyasi xodimi bo‘lmaganini isbotlashga muvaffaq bo‘ldi. Sud ma’muriy qoidabuzarlik haqidagi qarorni bekor qilish haqida hukm chiqardi.
Izoh (0)