Toshkentdagi Inha universitetida sportcha baliq ovi, mikrogidrostansiya tashkil etish va qayta tiklanuvchi energiya manbalari muhokama qilinadi

Toshkentdagi Inha universitetida 4-iyun, shanba kuni yashil loyihalar taqdimoti va muhokamasiga bag‘ishlangan Green Business Platform’ning uchinchi uchrashuvi bo‘lib o‘tadi. Bu haqda tadbirning rasmiy saytida axborot berilgan.

Uchrashuvda O‘zbekistonning turli viloyatlaridan tashrif buyurgan tadbirkor va ishbilarmonlar, ekologik toza texnika va texnologiyalarni ishlab chiqarish, tatbiq etish va ulardan foydalanishga ixtisoslashgan korxona va tashkilotlarning vakillari ishtirok etdi.

Bo‘lajak tadbirda mikrogidrostansiya tashkil etish va tomchilab sug‘orish tizimlarini yaratish tajribasi, sportcha baliq ovi va akvaponika (baliq va o‘simliklarni birgalikda yetishtirish)ni O‘zbekistonda rivojlantirish istiqbollari, Orolbo‘yining ishdan chiqqan yerlarida indigoferalarni ko‘paytirish va uning biotexnologiyasi, qayta tiklanuvchi energiya manbalari haqida taqdimot va ma’ruzalar bo‘lib o‘tishi kutilmoqda.

Green Business Platform’ning navbatdagi uchrashuvida qatnashish uchun loyiha saytida ariza qoldirish yoki Facebook’dagi maxsus sahifada “Tadbirga boraman” tugmasini bosish kerak.