Физика-математика фанлари номзоди Доплер эффектига таянган ҳолда, машинасининг тезлиги «КРИС-П» радари орқали тўғри ўлчанганига шубҳа билдирди, деб ёзади TJournal.
Юрий Горюновнинг «Лада-Гранта»си Татаристонда 2015 йил августида «КРИС-П» кўчма мажмуаси объективига тушган эди. Камера ўлчовларига кўра, автомобиль соатига 92 км тезликда ҳаракатланиб, белгиланган меъёрдан 22 км/соатга ошган. Бунинг учун Қозон ОТМларидан бирининг ўқитувчиси 500 рубль жаримага тортилган.
Горюнов унинг спидометри тезликни соатига 80 километрдан кўп кўрсатмаганига амин эди, шу туфайли у радар қандай ишлашини тушуниб олишга қарор қилди.
Физик фоторадар олган суратларни ўрганиб чиқаётиб, унинг датчиги ўз автомобилининг таг қисмидан пастроқда жойлашганига эътибор қаратди. «Физик сифатида бундай шароитларда ушбу атмосфера қатламида радиотўлқинлар тарқалиши камайиши ва шу сабабдан тезлик ўлчови натижалари оширилган бўлиб чиқиши ҳақида хулоса қилдим», — деди олим.
«КРИС-П» ҳужжатларини ўқиб чиққач эса, у фоторадар датчигининг 25 даражали бурчакдан кўра пастроқ даража остида ўрнатилиши транспорт воситаси тезлигини ўлчаш натижалари жуда ошириб юборилишига олиб келишини аниқлади.
Радиотўлқинларнинг атмосферада тарқалиши, шунингдек, радар иши асосланган Доплер эффекти (нурланиш манбаси ва/ёки кузатувчининг силжиши оқибатида кузатувчи томонидан қабул қилинаётган нурланиш тўлқини частотаси ва узунлигининг ўзгариши) ҳақидаги маълумотни Горюнов судда ҳимоя чоғида қўллади.
Горюнов, охир-оқибат, «КРИС-П» мажмуаси ўша ҳолатда нотўғри ўрнатилганини, бунинг устига, унинг ёнида, кўрсатмада белгилангани каби, Йўл ҳаракати хавфсизлиги давлат инспекцияси ходими бўлмаганини исботлашга муваффақ бўлди. Суд маъмурий қоидабузарлик ҳақидаги қарорни бекор қилиш ҳақида ҳукм чиқарди.
Изоҳ (0)