Iroq qo‘shinlari va ko‘ngillilar Al-Falluja shahrini o‘rab oldi
Iroq qo‘shinlari va sunniy ko‘ngillilar Bag‘doddan 50 kilometr uzoqlikdagi Al-Falluja shahri atrofini to‘liq nazorat qilmoqda. Bu haqda tezkor shtab boshlig‘i Abdul Amir ash-Shimariy ma’lum qildi, deya xabar beradi “TASS”.
“Qo‘shinlar shaharning markaziy tumanlaridan 2—3 kilometr uzoqlikda bo‘lib turibdi. IShID jangarilari yo‘qotishlarga uchragan va chekinmoqda”, — deya ta’kidlagan general.
“Al-Mayadin” telekanaliga ko‘ra, Al-Fallujaga Bag‘doddan nufuzli tezkor javob qaytarish kuchlarining 5 ming jangchisi tashlangan. Ular shia tuzilmalarini almashtirdi, bu asosan sunniylardan iborat shaharni ozod qilish chog‘ida mazhablararo kelishmovchiliklar oldini olish maqsadida amalga oshirilgan.
Al-Fallujada operatsiya boshlangunicha shaharni tark etishga ulgurmagan 50—90 ming atrofida aholi borligi bildirilmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
