Bugun, 25-may kuni respublikadagi barcha umumta’lim maktablarida “Xayr, maktab – salom, kollej!” tadbirlari “Zamonaviy bilimlar bilan zamonaviy kasb-hunarga ega bo‘lamiz” shiori ostida tashkil etildi. Bu haqda Xalq ta’limi vazirligi matbuot xizmati “Daryo”ga xabar bermoqda.
Tadbirlarda mahalla fuqarolar yig‘inlari faollari, faxriy o‘qituvchilar, ota-onalar, maktabning sobiq bitiruvchilari va huquqni muhofaza qilish idoralari vakillari ishtirok etdi. O‘z qobiliyati va iqtidori bilan bilimlar bellashuvi, fan olimpiadasi, turli sport musobaqalarida yuqori o‘rinlarni egallagan o‘quvchilar alohida taqdirlandi.
Shuningdek, “Eng ibratli o‘quvchi”, “Eng faol o‘quvchi”, “Ijodkor o‘quvchi”, “Yosh ixtirochi”, “Maktabimiz faxri”, “Sport ustasi”, “Kompyuter ustasi”, “Eng orasta qiz” kabi nominatsiyalar bo‘yicha iqtidorli va namunali o‘quvchilar taqdirlandi.
Tadbir nihoyasiga yetgach, barcha maktab bitiruvchilari o‘z qiziqishi bo‘yicha tanlagan akademik-litsey va kasb-hunar kollejiga ota-onalari bilan birga tashrif buyurib, u yerdagi shart-sharoitlar bilan yaqindan tanishdi.
2015—2016-o‘quv yili davomida umumta’lim maktablarining 9-sinfini tugatayotgan 476 616 nafar o‘quvchini ta’limning keyingi bosqichiga to‘liq qamrab olish maqsadida bir necha bor “So‘rovnoma”lar o‘tkazilib, ularning akademik litsey yoki kasb-hunar kollejida o‘qishni davom ettirish istagi aniqlandi. So‘rovnoma natijalariga ko‘ra bitiruvchilarning 42 870 nafari akademik litseylarda, 433 738 nafari esa kasb-hunar kollejlarida o‘qish niyatida ekanini bildirgan.
Izoh (0)