O‘zbekiston milliy terma jamoasi 2-iyun kuni Afrika qit’asi termasi bilan o‘ynashi mumkin

2018-yil Rossiyada bo‘lib o‘tadigan futbol bo‘yicha Jahon Chempionatining so‘nggi saralash bosqichiga tayyorgarlik ko‘rayotgan O‘zbekiston milliy terma jamoasi 2-iyun kuni Afrika termalaridan biriga qarshi o‘rtoqlik o‘yinida maydonga tushishi mumkin. Bu haqda o‘zbekistonlik futbol mutaxassisi Alisher Nikimbayev Twitter’dagi sahifasida ma’lum qildi.

• O‘zbekiston milliy terma jamoasi 2-iyun kuni Toshkentda o‘rtoqlik uchrashuvi o‘tkazishi mumkin

Alisher Nikimbayev o‘z sahifasiga “Yevropalik do‘stlarimning aytishiga qaraganda, 2-iyun kuni Toshkentga Afrika terma jamoalaridan biri tashrif buyurishi mumkin. FIFA reytingida u Qirg‘iziston terma jamoasidan yuqorida joylashgan”, — deb yozgan. Biroq terma jamoa nomiga aniqlik kiritmagan.

Ma’lumot uchun, Qirg‘iziston terma jamoasi FIFA reytingida 100-o‘rinni egallab turibdi. Undan oldingi pog‘onalarda borayotgan Afrika qit’asining 25 ta terma jamoasi mavjud.

• O‘zbekiston milliy terma jamoasi FIFA reytingida 66-pog‘onani saqlab qoldi

3—5-iyun kunlari Afrika Millatlar Kubogi uchun saralash uchrashuvlari tashkil etiladi va unda qit’a terma jamoalari navbatdagi tur o‘yinlarida maydonga tushadi. Jumladan, FIFA reytingida Qirg‘iziston terma jamoasidan oldinda borayotgan 25 ta terma jamoadan 23 tasi ham.

Nigeriya va Chad terma jamoalari o‘rtasidagi bellashuv Chadning moliyaviy ahvoli tufayli bekor qilingan. Mazkur termaning barcha natijalari 0 ga tenglashtirilgan. Agar O‘FF Chadning Toshkentga kelish xarajatlarini ko‘tarsa yoki Nigeriya bilan kelishuvga erishsa, mazkur termalar 2-iyun kuni Toshkentga tashrif buyurishi mumkin.

Marokash termasi esa saralash o‘yinlarini muvaffaqiyatli yakunlab bo‘ldi. Demak, bu terma jamoa uchun navbatdagi tur u qadar ahamiyatli emas. Gabon terma jamoasi esa Afrika Millatlar Kubogiga mezbonlik qiladi. Bu termaning saralashdagi o‘yinlari va unda qo‘lga kiritgan ochkolari rasmiy maqomga ega emas. Shunday ekan, bu ikki terma jamoada ham 2-iyun kuni Toshkentga tashrif buyurishning imkoni bor.

Shuningdek, Ekvatorial Gvineya terma jamoasi saralashning navbatdagi tur o‘yinlaridan qat’i nazar uni muvaffaqiyatli yakunlay olmaydi. Shundan kelib chiqib, bu terma jamoa 3-iyun kungi rasmiy o‘yinga ikkinchi tarkib futbolchilari bilan yo‘l olib, Toshkentga asosiy tarkibi bilan yetib kelishi yoki shuning aksini afzal bilishi mumkin.

Norasmiy ma’lumotlarga ko‘ra, O‘FF Afrika terma jamoasi bilan muzokara o‘tkazmoqda. Agar u ijobiy yakun topsa, tez orada raqib jamoa nomi ham aniq bo‘ladi. Bu borada Alisher Nikimbayevning Twitter sahifasida yozgan ma’lumoti va Afrika termalarining saralashdagi ishtirokidan kelib chiqilsa, Nigeriya, Marokash, Gabon, Ekvatorial Gvineya yoki Chad termalaridan biri Toshkentga tashrif buyurishi mumkin.

Ma’lumot uchun, O‘zbekiston milliy terma jamoasi Afrika qit’asi vakillaridan Nigeriyaga qarshi 2 ta uchrashuv o‘tkazgan va ularning har ikkisi ham 1995-yilda bo‘lib o‘tgan. Toshkentda 3:2 hisobiga zafar quchgan Nigeriya, Lagos shahrida 1:0 hisobida muvaffaqiyat qozongan.

• O‘zbekiston — Qirg‘iziston: qirg‘izistonlik muxlislar bellashuvdan shod, o‘zbekistonliklar esa aksincha

• O‘zbekiston va Qirg‘iziston o‘rtasidagi o‘rtoqlik uchrashuvi bekor qilindi

Qayd etish kerak, 2-iyun kuni O‘zbekiston milliy terma jamoasi Qirg‘izistonga qarshi o‘rtoqlik o‘yinida maydonga tushishi 12-may kuni ma’lum bo‘lgandi. Bu xabar 10-may kuni Livan terma jamoasining Qirg‘iziston bilan o‘rtoqlik o‘yinini bekor qilinganidan 2 kun o‘tib paydo bo‘ldi. Qirg‘iziston terma jamoasining Toshkentga tashrif buyurishi ma’lum bo‘lganidan 8 kun o‘tib esa O‘zbekiston terma jamoasi bilan o‘yin ham o‘tkazilmaydigan bo‘ldi.