Ўзбекистон миллий терма жамоаси 2 июнь куни Африка қитъаси термаси билан ўйнаши мумкин

2018 йил Россияда бўлиб ўтадиган футбол бўйича Жаҳон Чемпионатининг сўнгги саралаш босқичига тайёргарлик кўраётган Ўзбекистон миллий терма жамоаси 2 июнь куни Африка термаларидан бирига қарши ўртоқлик ўйинида майдонга тушиши мумкин. Бу ҳақда ўзбекистонлик футбол мутахассиси Алишер Никимбаев Twitter’даги саҳифасида маълум қилди.

• Ўзбекистон миллий терма жамоаси 2 июнь куни Тошкентда ўртоқлик учрашуви ўтказиши мумкин

Алишер Никимбаев ўз саҳифасига «Европалик дўстларимнинг айтишига қараганда, 2 июнь куни Тошкентга Африка терма жамоаларидан бири ташриф буюриши мумкин. ФИФА рейтингида у Қирғизистон терма жамоасидан юқорида жойлашган», — деб ёзган. Бироқ терма жамоа номига аниқлик киритмаган.

Маълумот учун, Қирғизистон терма жамоаси ФИФА рейтингида 100-ўринни эгаллаб турибди. Ундан олдинги поғоналарда бораётган Африка қитъасининг 25 та терма жамоаси мавжуд.

• Ўзбекистон миллий терма жамоаси ФИФА рейтингида 66-поғонани сақлаб қолди

3—5 июнь кунлари Африка Миллатлар Кубоги учун саралаш учрашувлари ташкил этилади ва унда қитъа терма жамоалари навбатдаги тур ўйинларида майдонга тушади. Жумладан, ФИФА рейтингида Қирғизистон терма жамоасидан олдинда бораётган 25 та терма жамоадан 23 таси ҳам.

Нигерия ва Чад терма жамоалари ўртасидаги беллашув Чаднинг молиявий аҳволи туфайли бекор қилинган. Мазкур терманинг барча натижалари 0 га тенглаштирилган. Агар ЎФФ Чаднинг Тошкентга келиш харажатларини кўтарса ёки Нигерия билан келишувга эришса, мазкур термалар 2 июнь куни Тошкентга ташриф буюриши мумкин.

Марокаш термаси эса саралаш ўйинларини муваффақиятли якунлаб бўлди. Демак, бу терма жамоа учун навбатдаги тур у қадар аҳамиятли эмас. Габон терма жамоаси эса Африка Миллатлар Кубогига мезбонлик қилади. Бу терманинг саралашдаги ўйинлари ва унда қўлга киритган очколари расмий мақомга эга эмас. Шундай экан, бу икки терма жамоада ҳам 2 июнь куни Тошкентга ташриф буюришнинг имкони бор.

Шунингдек, Экваториал Гвинея терма жамоаси саралашнинг навбатдаги тур ўйинларидан қатъи назар уни муваффақиятли якунлай олмайди. Шундан келиб чиқиб, бу терма жамоа 3 июнь кунги расмий ўйинга иккинчи таркиб футболчилари билан йўл олиб, Тошкентга асосий таркиби билан етиб келиши ёки шунинг аксини афзал билиши мумкин.

Норасмий маълумотларга кўра, ЎФФ Африка терма жамоаси билан музокара ўтказмоқда. Агар у ижобий якун топса, тез орада рақиб жамоа номи ҳам аниқ бўлади. Бу борада Алишер Никимбаевнинг Twitter саҳифасида ёзган маълумоти ва Африка термаларининг саралашдаги иштирокидан келиб чиқилса, Нигерия, Марокаш, Габон, Экваториал Гвинея ёки Чад термаларидан бири Тошкентга ташриф буюриши мумкин.

Маълумот учун, Ўзбекистон миллий терма жамоаси Африка қитъаси вакилларидан Нигерияга қарши 2 та учрашув ўтказган ва уларнинг ҳар иккиси ҳам 1995 йилда бўлиб ўтган. Тошкентда 3:2 ҳисобига зафар қучган Нигерия, Лагос шаҳрида 1:0 ҳисобида муваффақият қозонган.

• Ўзбекистон — Қирғизистон: қирғизистонлик мухлислар беллашувдан шод, ўзбекистонликлар эса аксинча

• Ўзбекистон ва Қирғизистон ўртасидаги ўртоқлик учрашуви бекор қилинди

Қайд этиш керак, 2 июнь куни Ўзбекистон миллий терма жамоаси Қирғизистонга қарши ўртоқлик ўйинида майдонга тушиши 12 май куни маълум бўлганди. Бу хабар 10 май куни Ливан терма жамоасининг Қирғизистон билан ўртоқлик ўйинини бекор қилинганидан 2 кун ўтиб пайдо бўлди. Қирғизистон терма жамоасининг Тошкентга ташриф буюриши маълум бўлганидан 8 кун ўтиб эса Ўзбекистон терма жамоаси билан ўйин ҳам ўтказилмайдиган бўлди.