Shu yilning 14-may, shanba kuni futbol bo‘yicha O‘zbekiston Oliy Ligasining 9-turida “Qo‘qon-1912” safarda “Navbahor” jamoasiga 1:5 hisobida imkoniyatni boy berib, mavsumdagi 6-mag‘lubiyatini qabul qildi. “Qo‘qon-1912” matbuot xizmatining ma’lum qilishicha, mazkur uchrashuvdan so‘ng o‘tkazilgan matbuot anjumanida qo‘qonliklar bosh murabbiyi Murod Ismoilov qoniqarsiz natijalardan so‘ng klub rahbariyatidan iste’fo so‘ragan.
16-may, dushanba kuni “Qo‘qon-1912” futbol klubining navbatdan tashqari yig‘ilishi bo‘lib o‘tdi. Yig‘ilishda Qo‘qon shahar hokimi hamda shahar futbol federatsiyasi prezidenti A. Abdullayev, “Qo‘qon-1912” futbol klubi vitse-prezidenti B. Tolipov va jamoaning barcha murabbiy hamda futbolchilari ishtirok etdi, deb xabar berdi klub matbuot xizmati.
Yig‘ilish davomida Qo‘qon shahar hokimi Murod Ismoilovga barcha qilgan ishlari uchun minnatdorchilik bildirgan holda u kishining iste’fosi qabul qilinganligini ma’lum qildi. Shuningdek, 16-may kunidan boshlab “Qo‘qon-1912” jamoasini bosh murabbiy sifatida Sergey Kovshov boshqarishi, yana bir mutaxassis Tohir Kapadze esa jamoa menejeri lavozimida faoliyat yuritishi va klub natijalariga javob berishi haqida ma’lum qilindi.
“Championat.asia”ning xabar berishicha, Murod Ismoilov sobiq jamoasi – “Neftchi”ga qaytdi. 47 yoshli mutaxassis bosh murabbiy Andrey Fyodorovga yaqindan yordam berishi ko‘zda tutilgan.
Qayd etish joiz, o‘tkazilgan 9 turdan so‘ng “Qo‘qon-1912” Oliy Liganing 16 ta jamoa orasida 6 ochko bilan 14-o‘rinda bormoqda.
Izoh (0)