Шу йилнинг 14 май, шанба куни футбол бўйича Ўзбекистон Олий Лигасининг 9-турида «Қўқон-1912» сафарда «Навбаҳор» жамоасига 1:5 ҳисобида имкониятни бой бериб, мавсумдаги 6-мағлубиятини қабул қилди. «Қўқон-1912» матбуот хизматининг маълум қилишича, мазкур учрашувдан сўнг ўтказилган матбуот анжуманида қўқонликлар бош мураббийи Мурод Исмоилов қониқарсиз натижалардан сўнг клуб раҳбариятидан истеъфо сўраган.
16 май, душанба куни «Қўқон-1912» футбол клубининг навбатдан ташқари йиғилиши бўлиб ўтди. Йиғилишда Қўқон шаҳар ҳокими ҳамда шаҳар футбол федерацияси президенти А. Абдуллаев, «Қўқон-1912» футбол клуби вице-президенти Б. Толипов ва жамоанинг барча мураббий ҳамда футболчилари иштирок этди, деб хабар берди клуб матбуот хизмати.
Йиғилиш давомида Қўқон шаҳар ҳокими Мурод Исмоиловга барча қилган ишлари учун миннатдорчилик билдирган ҳолда у кишининг истеъфоси қабул қилинганлигини маълум қилди. Шунингдек, 16 май кунидан бошлаб «Қўқон-1912» жамоасини бош мураббий сифатида Сергей Ковшов бошқариши, яна бир мутахассис Тоҳир Кападзе эса жамоа менежери лавозимида фаолият юритиши ва клуб натижаларига жавоб бериши ҳақида маълум қилинди.
«Championat.asia»нинг хабар беришича, Мурод Исмоилов собиқ жамоаси – «Нефтчи»га қайтди. 47 ёшли мутахассис бош мураббий Андрей Фёдоровга яқиндан ёрдам бериши кўзда тутилган.
Қайд этиш жоиз, ўтказилган 9 турдан сўнг «Қўқон-1912» Олий Лиганинг 16 та жамоа орасида 6 очко билан 14-ўринда бормоқда.
Изоҳ (0)