20 йилдан бери орол-давлат раҳбари лавозимини эгаллаб келаётган Исландия президенти Олавур Рагнар Гримссон 25 июнга белгиланган президентлик сайловларидан номзодини олди. Бу ҳақда унинг 9 май, душанба куни тарқатилган расмий баёнотида маълум қилинди, деб хабар беради «ТАСС».
Ўтган ҳафтада тарихчи Гудни Йоханнессон ва мамлакатнинг собиқ бош вазири, Morgunbladid газетаси эгаси Давид Оддссон сайловолди пойгасида иштирок этишини эълон қилди. Давлат раҳбари айнан муносиб номзодларнинг пайдо бўлгани олтинчи бор сайловларда қатнашишдан воз кечишига сабаб бўлганини билдирган.
Шуниси ҳам борки, Гримссон журналистлар унинг турмуш ўртоғи Доррит Муссайефф офшор компаниялари билан боғлиқлигини аниқлаганидан сўнг шундай баёнот берди. Биринчи хоним ва унинг ота-оналари — Moussaieff Jewelers Limited заргарлик фирмаси соҳиблари офшорларда улушларга эгалик қилган. Бухоро яҳудийлари сулоласи вакили бўлган Муссайеффлар (Мусаевлар) оиласининг мол-дунёси юзлаб миллион долларга баҳоланади.
Эслатиб ўтамиз, олдинроқ Исландия бош вазири Сигмюндюр Давид Гюннлёйгссон офшор можароси туфайли истеъфога чиққанди.
Изоҳ (0)