CNN: Indianadagi g‘alaba Tramp prezidentlikka rasman nomzod etib ilgari surilishi uchun muhim qadam

Respublikachilar partiyasidan AQSh prezidentligiga nomzodlikka da’vogar Donald Tramp uchun Indiana shtatidagi dastlabki saylovlardagi g‘alaba partiyadan rasman nomzod etib ilgari surilishida muhim qadam bo‘ladi. Uning asosiy raqibi senator Ted Kruz uchun esa Indianadagi saylovlar natijalari “hayot-mamot masalasi”ni anglatadi. CNN telekanali mazkur shtatdagi praymerizga shunday baho berdi, deya ma’lum qildi “TASS”. 

“Tramp Indiana shtatida g‘olib chiqqan taqdirda uning respublikachilar milliy syezdida prezidentlikka rasman nomzod sifatida ilgari surilmasligini tasavvur etish qiyin. Shubhasiz, Indianadagi g‘alaba unga nomzodlik kafolatlanishida muhim qadam bo‘ladi”, — deya ta’kidlagan telekanalga bergan intervyusida AQSh Kongressi vakillar palatasining Indiana shtatidan a’zosi Adam Kinzinger. 

Ma’lumot uchun, mazkur shtatda amalda bo‘lgan qoidalarga ko‘ra, dastlabki saylovlarda g‘olib chiqqan nomzod Indiana delegatlarining barcha ovozini oladi.