BMT Aleppodagi janglarda yuzlab kishilar halok bo‘lgani va yaralanganini ma’lum qildi

Suriyaning Aleppo shahridagi jangovar harakatlar oqibatida so‘nggi ikki hafta mobaynida yuzlab odamlar halok bo‘ldi va jarohatlandi. Bu haqda BMT bosh kotibi rasmiy vakili Stefan Dyujarrik ma’lum qildi, deya xabar beradi “TASS”.

“Hamkasblarimiz oxirgi ikki hafta davomida Aleppo va uning yaqinida jangovar harakatlarning keskinlashuvi yuzlab odamlar qurbon bo‘lishi va yaralanishiga olib kelgani, ulardan ko‘pi bolalar ekanligini bildirmoqda. Maktablar, kasalxonalar va boshqa infratuzilma obyektlari shikastlangan. Albatta, bu gumanitar operatsiyalar o‘tkazilishiga to‘sqinlik qiladi”, — deya ta’kidlagan Dyujarrik.

Rasmiy vakil BMT mamlakatning boshqa hududlari, jumladan, o‘tgan haftada keskin janglar va havo bombardimonlari qayta boshlangan Deraa viloyatida zo‘ravonlik avj olayotganidan ham xavotirda ekanligini bildirgan.

Eslatib o‘tamiz, 4-may, chorshanba kuni Arab davlatlari ligasi Qohiradagi shoshilinch yig‘ilishda Aleppodagi vaziyatni muhokama qiladi.