APL. “Tottenhem” o‘z maydonida ochko yo‘qotib, “Lester”ni chempionlikka yaqinlashtirdi

Futbol bo‘yicha Angliya Premyer-ligasining 35-turiga kelib chempionlik uchun kurash olib borayotgan Londonning “Tottenhem” klubi o‘z maydonida 2 ochko yo‘qotdi.

“Vest Bromvich”ga qarshi o‘yinning 33-daqiqasida Kreyg Douson o‘z darvozasiga yo‘l topib, “Tottenhem”ni hisobda oldinga olib chiqqandi. 73-daqiqaga kelib Dousonning o‘zi mezbonlar darvozasini ishg‘ol qilib, hisobni tenglashtirdi. Qolgan daqiqalarda Maurisio Pochettino jamoasi g‘alaba golini kirita olmadi.

35-turdan keyin peshqadam “Lester” 76 ochkoga ega. “Tottenhem” hisobida 69 ochko bor. “Manchester Siti” hamda “Arsenal” 64 tadan ochko jamg‘argan.

• APL, 35-tur. Jeymi Vardisiz o‘ynagan “Lester” Uels klubi darvozasiga 4 ta gol urishga erishdi

“Lester” mamlakat chempionligini qo‘lga kiritishi uchun yana 1 ta g‘alaba kerak bo‘ladi. Oldindagi uch turda Klaudio Ranyeri jamoasi “Manchester Yunayted” hamda “Chelsi” maydoniga tashrif buyuradi va faqatgina “Everton”ga qarshi o‘yinni o‘z maydonida o‘tkazadi.

“Tottenhem” nazariy jihatdan chempionlik uchun imkoniyatni saqlab turibdi. Shu bilan birgalikda, bir yo‘la medallardan ham quruq qolishi mumkin. Aniq bo‘lib ulgurgan yagona masala — London klubining kelasi mavsum Chempionlar Ligasida ishtirok etishidir.

Angliya Premer-ligasi 35-tur bellashuvi 25 aprel, dushanba

“Tottenhem” — “Vest Bromvich” 1:1

Gollar: Kreyg Douson, 33-avt (1:0). Kreyg Douson, 73 (1:1).“Tottenhem”: Ugo Lyoris, Denni Rouz, Yan Vertongen, Tobi Alderveyreld, Kayl Uolker, Erik Dayer (Rayan Meyson, 75), Mussa Dembele, Erik Lamela (Son Xyun Min, 85), Kristian Eriksen, Dele Alli (Naser Shadli, 90), Harri Keyn.