Iqtisodiyot, tibbiyot va kimyo bo‘yicha Nobel mukofotiga munosib ko‘rilgan Norvegiya, Buyuk Britaniya va Isroil vakillari KXDRga borib, u yerdagi bir qancha oliygohlar, jumladan, Kim Ir Sen nomidagi universitetda talabalar bilan seminar mashg‘ulotlari o‘tkazadi va ularga ma’ruza o‘qib beradi. Bu haqda, G‘arb matbuotiga tayanib, “Interfaks” xabar berdi.
Safarni tashkillashtirayotgan Vena xalqaro tinchlik jamg‘armasi vakillari gap iqtisodiy siyosat va tibbiyotni rivojlantirish singari masalalarga yo‘naltirilgan “sokin diplomatiya” haqida ketayotganini bildirdi.
“Shimoliy Koreyaning yosh avlodi bilan ishlash va hamkorlikni yo‘lga qo‘yish kelajakda siyosatdan tashqari munosabatlarni yaxshilashga yordam beradigan dialog uchun asos bo‘lib xizmat qilishi mumkin”, — deb bu tashabbusga izoh berdi jamg‘arma raisi Uve Moravets.
Moravetsning o‘zi oxirgi ikki yil ichida Shimoliy Koreyaga olti marta safar uyushtirdi.
Izoh (0)