Tarkibiga Süddeutsche Zeitung gazetasi kiradigan Seuddeutscher Verlag nashriyoti (Germaniya) Rossiya prezidenti Vladimir Putinning muloqoti chog‘ida ushbu nashr egasi haqidagi adashuv uchun Kreml tomonidan rasman uzr so‘ralganidan qoniqish bildirdi. Bu haqda “TASS” xabar bermoqda.
“Seuddeutscher Verlag Kreml prezident Putinning muloqotida bayon qilingan yanglish da’vo qaytarib olinganini ma’qullaydi”, — deyiladi nashriyot bayonotida.
Vladimir Putin 14-aprel, payshanba kuni bo‘lib o‘tgan to‘g‘ridan-to‘g‘ri muloqoti davomida noma’lum manba “Panama arxivi” materiallarini yetkazgan Germaniyaning Süddeutsche Zeitung nashri amerikaliklar boshqaradigan mediaxolding tarkibiga kirishini ta’kidlagan, bunga “Hamma joydan buyurtmachining qulog‘i ko‘rinib turibdi”, deb izoh bergandi.
Gazeta ijrochi direktori Stefan Xilsher Putinning bayonotini rad etib, nashr amerikaliklarga to‘g‘ridan-to‘g‘ri ham, vositachilar orqali ham tegishli emasligi, gazetani Süddeutscher Verlag guruhi chop etishi, u esa o‘z navbatida Südwestdeutschen Medienholding (81,25 foiz) xoldingi va nashr asoschilari oilasiga (18,75 foiz) qarashli ekanligini ta’kidlagan.
Eslatib o‘tamiz, Rossiya prezidentining matbuot kotibi Dmitriy Peskov Vladimir Putinga Süddeutsche Zeitung Amerikaning Goldman Sachs banki bilan bog‘liqligi haqida noto‘g‘ri ma’lumot yetkazilganligi uchun jazolanganligini ma’lum qilgan.
Izoh (0)