1996—2004-yillarda Ispaniya bosh vaziri o‘rinbosari, 2004—2007-yillarda Xalqaro valyuta jamg‘armasi (XVJ) ijrochi direktori bo‘lib ishlagan Rodrigo Rato “Panama arxivi” hujjatlarida qayd etilgan. Bu haqda “Vedomosti” xabar bermoqda.
El Confidencial nashrining ma’lum qilishicha, Ratoga tegishli kompaniya boshqargan korxona 2013-yili Mossack Fonseca firmasiga XVJning sobiq rahbari daromadlarini yashirish uchun 20 yil davomida ishlatib kelgan Westcastle Corporation va Red Rose Financial Enterprises korxonalarini yopish masalasida murojaat etgan.
Rodrigo Rato bir yil avval soliq to‘lashdan qochish, mablag‘dan shubhali foydalanish va mulkni noqonuniy o‘zlashtirishda gumon qilinib, qo‘lga olingan, biroq uyi va ofisidagi tintuvlardan so‘ng qo‘yib yuborilgandi. 2015-yil oktabrida sud Ratoni ozodlikda qoldirdi, biroq pasportini olib qo‘yib, oyda bir marta sudga kelish majburiyatini yukladi. Rato ofshorlarda yashirilgan mablag‘lar kelib turgan “qora karta”lardan foydalanishda gumon qilinmoqda. “Panama arxivi” bo‘yicha fosh bo‘lgan yangi ma’lumotlar ham sud ixtiyoriga kelib tushgan.
Izoh (0)