O‘zbek milliy akademik drama teatri aktyori Hamid Toshpo‘latov bir ampluaga tushib qolgani haqidagi fikrlarni rad etib, xonanda Hojiakbar Haydarovning “Do‘lana” klipida pul uchun suratga tushmaganini ma’lum qildi. Bu haqda aktyor “Sug‘diyona” gazetasiga bergan intervyusida aytib o‘tdi.
— Aksariyat aktyor-aktrisalar bir ampluaga tushib qoladi. Sizni ham ko‘pincha qattiqqo‘l ota, jahldor qaynota yoki amaldor obrazida ko‘ramiz.— Faqat serjahl otalarni o‘ynayotganim yo‘q. Yumshoq fe’lli qahramonlarim ham bor. Komedik obrazlarni ham gavdalantiraman. Aktyorman axir, har qanday holatga kira olishim kerak.
— Kino yoki seriallarni tushunamiz, ammo kliplarda-chi?— Yashirmayman, bu masalaning moddiy tomonlari bor. Qolaversa, tanish-bilishlar iltimosini yerda qoldirolmaysiz-da. Ijro qilib berasiz.
— Rad etsangiz, nima bo‘ladi?— Shundoq ham ko‘p takliflarni rad etayapman. Kliplarga chaqirishadi, ammo hammasiga ham boravermayman. Lekin shuni ham hamma har xil tushunadi. Muhimi, klipdagi obrazim bachkana bo‘lib qolmasin. Men shundan qo‘rqaman.
— Hojiakbar Haydarovning “Do‘lana” klipidagi ijrongiz-chi, Sizningcha, bachkana emasmi?— Shu klipda qatnashishim uchun bir necha tanish-bilishlar o‘rtaga tushdi. Nuriddin Haydarov do‘stim edi. O‘g‘liga yo‘q deya olmadim. Tesha Mo‘minov, Erkin Komilov bilan birga bordik, ammo klip sujetidan xabarimiz yo‘q edi. Bilganimizdan keyin esa ortga qayta olmasdik, otasining hurmati. Bor gap shu. Hech qanday pul-mul degan gap bo‘lmagan. “Do‘lana”dagi rolim kimgadir yoqmagan bo‘lsa, o‘zimni oqlamayman. Lekin qoralashga ham haqim yo‘q.
Izoh (0)