Yozuvchi Tohir Malik ko‘ngli og‘rigan paytda “jinnixona reportajlari”ni ko‘rishini ma’lum qildi

Taniqli yozuvchi Tohir Malik yomon kayfiyatni yengish borasidagi o‘z tajribasi bilan o‘rtoqlashdi. Bu haqda “Ziyouz.uz” xabar bermoqda.

“Men yomon kayfiyatni yengishga harakat qilaman. Ko‘nglim og‘rigan paytda televizordagi yaxshi narsalarni ham ko‘rgim kelmaydi. Shunda ashulachilarning kliplarini ko‘raman. Ha, aynan ko‘raman”, — dedi taniqli yozuvchi.

“Ovozlarini o‘chirib qo‘yaman. Chunki ashulalarining so‘zlarini eshitsam, tepa sochim tikka bo‘ladi. Ovozni o‘chirib, ularning harakatlarini ko‘rsam kulgim keladi. Siz ham bir tajriba qilib ko‘ring”, — dedi Tohir Malik.

“Ba’zilarida xuddi hayvonot bog‘ida ochiq eshiklar kuni o‘tkazilayotganga o‘xshaydi. Ba’zi ashulachilarning qorni burab og‘riyapti-yu, hojatxona eshigi oldida navbat kutib qiynalayotganga o‘xshaydi... Men ovozi o‘chirilgan kliplarga ‘Jinnixonadan reportaj’, deb nom qo‘yganman”, — deya qo‘shimcha qildi Tohir Malik.