Internetda Rossiya prezidenti, prezident ma’muriyati xodimlari, Rossiya Xavfsizlik Kengashi apparati ishchilari, shuningdek, ularning oila a’zolari daromadlari, xarajatlari va mulklari haqidagi rasmiy ma’lumotlar paydo bo‘ldi, deb yozadi “Avtovesti”. Ushbu hisobotda ular qanday avtomobillarga egalik qilishi ham keltirilgan.
Kreml rasmiy saytida e’lon qilingan hisobotda Putinning, xuddi avvalgidek, ikkita 21-“Volga”si, “Niva” yo‘ltanlamasi va “Skif” tirkamali avtomobili borligi aytiladi.
Putinning matbuot kotibi Dmitriy Peskov Toyota Land Cruiser 200, uning rafiqasi Tatyana Navka Mercedes-Benz CL63 va ML 63 yo‘ltanlamasi, Lexus RX350 krossoveri va Yamaha kvadrotsikliga egalik qiladi.
Prezident ma’muriyati rahbari Sergey Ivanov “ulovsiz” hisoblanadi, ammo uning xotini Porsche Cayenne’ga egalik qiladi. Xuddi shuningdek, Rossiya Xavfsizlik Kengashi kotibi Nikolay Patrushevning o‘zida mashina yo‘q, ammo rafiqasida Volkswagen Touran avtomobili bor.
Shuningdek, prezident maslahatchisi Sergey Glazyev Volvo XC90 va Audi Q7 krossoverlari va Mercedes-Benz Viano miniveni, prezident yordamchisi Vladimir Kojin Porsche Cayenne va Mitsubishi i-MiEV elektrokari, boshqa yordamchisi Vladislav Surkov Mercedes-Benz S600, Mercedes-Benz Viano va Ford Galaxy’ga egalik qiladi.
Eng katta avtopark esa Rossiya prezidenti maslahatchisi Sergey Grigorovga tegishli bo‘lib chiqdi. U va rafiqasi nomida Jeep Wrangler, Porsche Cayenne, ZAZ-965, Volvo V40 Cross Country, shuningdek, Royal Enfield Bullat, Black Douglas, Harley-Davidson FLSTC va Ural IMZ mototsikllari bor.
Izoh (0)