Facebook’dagi “Voditeli Tashkenta” guruhida Toshkentning Moyqo‘rg‘on ko‘chasidagi tirbandlik vaqtida qoidaga xilof ravishda yo‘lning qarama-qarshi qatnov qismiga chiqib ketgan avtomobillarning yangi videosi e’lon qilindi.
“Volga” avtomobili videoregistratori yordamida olingan holat shaharning Yunusobod tumanidagi Moyqo‘rg‘on ko‘chasida 14-aprel kuni tongda yuz bergan. Avvalroq xuddi shu joyda xuddi shu “Volga” egasi qoidabuzar sakkiz mashinaga yo‘l bermagani videosi e’lon qilingan edi.
Videoda o‘z qatnov qismi bo‘ylab kelayotgan “Volga”ning oldidan Yo‘l harakati qoidalariga xilof ravishda, qarama-qarshi qatnov qismiga chiqqan holda, Chevrolet Lacetti va Daewoo Nexia avtomobillari harakatlanib kelganini ko‘rish mumkin.
Ma’muriy javobgarlik to‘g‘risidagi kodeksning 128-5-moddasi (“Transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi”) 2-qismiga ko‘ra, transport vositalari haydovchilarining yo‘lning qarama-qarshi harakatlanish uchun mo‘ljallangan tomoniga yoki bo‘lagiga yo‘l harakati qoidalarini buzgan holda chiqishi eng kam ish haqining 10 baravari (14-aprel holatiga ko‘ra — 1 302 400 so‘m) miqdorida jarimaga sabab bo‘ladi.
Izoh (0)