2011—2016-yillar davomida Myanmani boshqargan va vakolat muddati shu yil mart oyida yakuniga yetgan sobiq prezident Teyn Seyn mamlakatning markaziy qismi, Mandalay shahri yaqinida joylashgan Dxamma Dipa buddaviy ibodatxonasiga ketdi. Bu haqda Myanma axborot vazirligi ma’lum qildi, deya xabar beradi “TASS”.
Vazirlikda bildirilishicha, 70 yoshli generalni rohiblikka qabul qilish marosimi 4-aprel, dushanba kuni bo‘lib o‘tgan. Diniy xizmat uzoq muddatga cho‘zilmaydi: sobiq prezident ibodatxonada besh kun bo‘lgach, odatiy hayot tarziga qaytadi.
Ibodatxonaga ketish taklifi Seynga bir necha oy avval, Butundunyo buddaviylar anjumanida bildirilgandi. Myanmaning eng nufuzli rohiblaridan biri Sitagu unga jamoaga qo‘shilishni taklif etgan, Seyn esa o‘z ishida juda band ekanligi, biroq prezidentlik muddati yakunlangach, mazkur marosimni o‘tashga tayyor ekanligini ma’lum qilgandi.
Izoh (0)