18-may kuni Jenevadagi Christie’s auksionida qachondir savdoga qo‘yilganlari orasida eng yirigi bo‘lgan ko‘k brilliant sotilishi mo‘ljallangan. Dastlabki hisob-kitoblarga ko‘ra, lot qiymati 38 dan 45 million dollargacha bo‘lishi mumkin, deya xabar beradi “RBK”.
“Oppengeymer ko‘ki” deb nom olgan 14,62 qirot (karat)li tosh uning avvalgi egasi, 80 yil davomida olmos qazib oluvchi De Beers konsernini boshqargan oila vakili bo‘lgan Filip Oppengeymer sharafiga atalgan.
Bloomberg agentligining bildirishicha, savdolar chog‘ida auksiondan sotilgan brilliantlar uchun maksimal narx yangilanishi ham mumkin. Hozirgi rekord Jenevadagi Sotheby’s auksionida o‘tgan yil noyabrida o‘rnatilgan bo‘lib, o‘shanda 12,03 qirotli “Moviy oy” brillianti 48,4 million dollarga sotilgandi.
Izoh (0)