Toshkentga kelgan Zidan, 500 mln evaziga “Real”ga o‘tishga rozi bo‘lgan Messi, 5000 ta Korzinka.uz supermarketi. 1-aprel hazillari dayjesti

1-aprel — Kulgi kunida O‘zbekiston va chet el ommaviy axborot vositalari o‘z mushtariylariga turli hazil xabarlarni ulashmoqda. Ularning ba’zilari bilan quyida tanishishingiz mumkin.

Zayniddin Zidan Toshkentga ikkinchi bor tashrif buyurdi

Xabar berishlaricha, Zidan 29-mart kuni bo‘lib o‘tgan O‘zbekiston — Bahrayn uchrashuvini “Bunyodkor” stadionidan tomosha qilib, O‘zbekiston milliy terma jamoasining ismi oshkor etilmayotgan futbolchisi harakatlarini diqqat bilan kuzatgan. Shuningdek, u “Kelin-kuyov” teleshousi muallifi va boshlovchisi Soat Sharipov bilan uchrashib, jumladan, shunday degan: “Siz qanchalik tez gapirsangiz, men o‘z futbolchilarim shunchalik tez yugurishlarini xohlayman”.

Messi 500 million yevro evaziga “Real Madrid”ga o‘tadi

“Barselona” hujumchisi Lionel Messi “Real Madrid” bilan besh yillik shartnoma borasida kelishib oldi, deb yozadi Goal. Xabar berishlaricha, Madrid klubi “Barselona”ga 250 million yevro to‘laydi, shuningdek, transfer bilan bog‘liq boshqa xarajatlar uchun yana shuncha pul sarflaydi. “Mendek inson xuddi Roman Abramovichniki kabi katta yaxtaga egalik qilishi kerak”, — deya Messining so‘zlaridan iqtibos keltirmoqda Goal.

Har bir podyezd oldida bittadan Korzinka.uz supermarketi quriladi

2016-yil oxirigacha O‘zbekistonda 5 mingta supermarket quriladi — mamlakatdagi har bir podyezd oldida bittadan Korzinka.uz bo‘ladi. Bu haqda supermarketlar tarmog‘i rahbari Zafar Hoshimov ma’lum qilgan, deyiladi Facebook’dagi “Potrebitel.uz” guruhida.

Fuqarolarning shiyponcha orqali qabul qilingan murojaatlari 30 kun emas, 10 kunda ko‘rib chiqiladi

UZINFOCOM markazining ma’lum qilishicha, “Jismoniy va yuridik shaxslarning murojaatlari to‘g‘risida”gi qonunga tuzatish kiritilgan. Unga ko‘ra, har bir tashkilot o‘z hududida chiroyli shiyponcha qurishi kerak. Shiyponcha orqali berilgan murojaatlar tezroq — 30 kun ichida emas, 10 kun ichida ko‘rib chiqiladi.

Turmush o‘rtog‘ining kotibasi tomonidan aldangan Nilufar Usmonova

Xonanda Nilufar Usmonova 1-aprel kuni qanday qaltis hazil qilishganini so‘zlab berdi, deb yozadi “Darakchi.uz” internet-nashri. “2—3 yil avval turmush o‘rtog‘imning qo‘l telefoni o‘chiq bo‘lgani uchun, ofisiga qo‘ng‘iroq qildim. Kotiba go‘shakni ko‘tarib: ‘Xo‘jayin ishda emas, xorijga safarga ketdi, aytmaganmidi?’, dedi. Avvaliga hayron bo‘ldim, keyin jahlim chiqdi”, — deydi xonanda.