Тошкентга келган Зидан, 500 млн эвазига «Реал»га ўтишга рози бўлган Месси, 5000 та Korzinka.uz супермаркети. 1 апрель ҳазиллари дайжести

1 апрель — Кулги кунида Ўзбекистон ва чет эл оммавий ахборот воситалари ўз муштарийларига турли ҳазил хабарларни улашмоқда. Уларнинг баъзилари билан қуйида танишишингиз мумкин.

Зайниддин Зидан Тошкентга иккинчи бор ташриф буюрди

Хабар беришларича, Зидан 29 март куни бўлиб ўтган Ўзбекистон — Баҳрайн учрашувини «Бунёдкор» стадионидан томоша қилиб, Ўзбекистон миллий терма жамоасининг исми ошкор этилмаётган футболчиси ҳаракатларини диққат билан кузатган. Шунингдек, у «Келин-куёв» телешоуси муаллифи ва бошловчиси Соат Шарипов билан учрашиб, жумладан, шундай деган: «Сиз қанчалик тез гапирсангиз, мен ўз футболчиларим шунчалик тез югуришларини хоҳлайман».

Месси 500 миллион евро эвазига «Реал Мадрид»га ўтади

«Барселона» ҳужумчиси Лионель Месси «Реал Мадрид» билан беш йиллик шартнома борасида келишиб олди, деб ёзади Goal. Хабар беришларича, Мадрид клуби «Барселона»га 250 миллион евро тўлайди, шунингдек, трансфер билан боғлиқ бошқа харажатлар учун яна шунча пул сарфлайди. «Мендек инсон худди Роман Абрамовичники каби катта яхтага эгалик қилиши керак», — дея Мессининг сўзларидан иқтибос келтирмоқда Goal.

Ҳар бир подъезд олдида биттадан Korzinka.uz супермаркети қурилади

2016 йил охиригача Ўзбекистонда 5 мингта супермаркет қурилади — мамлакатдаги ҳар бир подъезд олдида биттадан Korzinka.uz бўлади. Бу ҳақда супермаркетлар тармоғи раҳбари Зафар Ҳошимов маълум қилган, дейилади Facebook’даги «Потребитель.уз» гуруҳида.

Фуқароларнинг шийпонча орқали қабул қилинган мурожаатлари 30 кун эмас, 10 кунда кўриб чиқилади

UZINFOCOM марказининг маълум қилишича, «Жисмоний ва юридик шахсларнинг мурожаатлари тўғрисида»ги қонунга тузатиш киритилган. Унга кўра, ҳар бир ташкилот ўз ҳудудида чиройли шийпонча қуриши керак. Шийпонча орқали берилган мурожаатлар тезроқ — 30 кун ичида эмас, 10 кун ичида кўриб чиқилади.

Турмуш ўртоғининг котибаси томонидан алданган Нилуфар Усмонова

Хонанда Нилуфар Усмонова 1 апрель куни қандай қалтис ҳазил қилишганини сўзлаб берди, деб ёзади «Даракчи.uz» интернет-нашри. «2—3 йил аввал турмуш ўртоғимнинг қўл телефони ўчиқ бўлгани учун, офисига қўнғироқ қилдим. Котиба гўшакни кўтариб: ‘Хўжайин ишда эмас, хорижга сафарга кетди, айтмаганмиди?’, деди. Аввалига ҳайрон бўлдим, кейин жаҳлим чиқди», — дейди хонанда.