Tunislik ko‘cha musavviri Qohiradagi salkam 50 ta binoni bo‘yab, ulkan graffiti yaratdi (foto)

Tunislik ko‘cha musavviri eL Seed Misr poytaxti Qohiradagi salkam ellikta binoni shunday bo‘yab chiqdiki, har bir binoda suratning bir qismi chizilgan, yakuniy umumiy manzarani esa faqat tepalikning ma’lum bir nuqtasida turib kuzatish mumkin. Bu haqda TJournal hikoya qildi.

Graffitining yaratish uchun besh haftaga yaqin vaqt ketdi. “Qabul qilish” deya nom olgan surat qohiralik chiqindi yig‘uvchilarga bag‘ishlangan bo‘lib, ularning aksariyati eL Seed tomonidan bo‘yalgan binolarda istiqomat qiladi va an’anaviy ravishda jamiyatning past tabaqasi sanaladi.

“Koptlarning Zaraeeb jamoasi necha yillardan beri shahar chiqindisini yig‘ishtiradi, ular chiqindini qayta ishlashning samarali va daromadli tizimini ishlab chiqqan. Shunday bo‘lsa-da, ularni tuban va past tabaqa hisoblashadi. Ushbu jamoaga yorug‘lik olib kirish niyatida ularning yordamida salkam 50 ta binoni qamrab oluvchi va faqat ma’lum bir nuqtadan ko‘rinuvchi suratni yaratdim”, — deya ta’kidlaydi eL Seed.