Uber Technologies kompaniyasi Hindistonning Ola Cabs servisini sudga berdi. Bloomberg agentligiga asoslanib, “RBK”ning xabar qilishicha, AQSh kompaniyasi o‘z raqobatchisini mavqeiga putur yetkazishda ayblamoqda.
Da’vo arizasi Dehli okrugi Oliy sudiga kiritilib, 22-mart kuni ro‘yxatga olindi. Ish bo‘yicha eshituvlar 14-sentabrga belgilandi.
Har ikkala kompaniya ham taksi chaqirish servisiga egalik qiladi.
Uber vakillarining uqtirishicha, Ola xodimlari Uber tizimida 90 mingdan ortiq qalbaki akkaunt yaratib, ularni haqiqiy abonentlar ishlatmaydigan telefon raqamlariga bog‘lab qo‘ygan. So‘ng ushbu akkauntlar orqali 400 ming atrofida buyurtma berilgan va ular darhol bekor qilingan.
Buyurtmalarning yoppasiga bekor qilinishi qatorida, AQSh kompaniyasi Ola tomonidan o‘zi haqida haqiqatga mos kelmaydigan ma’lumotlar aks etgan xabarlar tarqatilayotganiga guvoh bo‘lganini ta’kidlamoqda. Shu tariqa, Uber Ola’ni g‘irrom yo‘llar bilan raqobatchisining mavqeini tushirishga va mijozlar ishonchini zaiflashtirishga urinishda ayblamoqda.
O‘z navbatida, Ola vakillari bu ayblovlarni “safsata” va “faktlarning buzib ko‘rsatilishi” deb hisoblamoqda.
Ma’lumot uchun, USM xoldingi egasi Alisher Usmonov har ikki kompaniyaning investori hisoblanadi. Biznesmen o‘z sheriklari bilan taksi chaqirish servislari hamda boshqa onlayn-loyihalarga investitsiyalar kiritish maqsadida 1 milliard dollar kapitalga ega jamg‘arma tashkil etgan edi.
Izoh (0)