Politsiya Bryussel aeroportidagi terakt Belgiya poytaxtida yashovchi Xalid va Ibrohim al-Bakraviylar tomonidan sodir etilganini aniqladi, deya xabar bermoqda “RBK”.
Ular jinoiy guruhga aloqadorlikda gumon qilinib, qidiruvga berilgan edi. Xususan, Bryusselda Xalid al-Bakraviy ijaraga olgan xonadon politsiya tomonidan bir hafta avval tintuv qilingan, biroq o‘shanda aka-ukalarni qo‘lga tushirishga muvaffaq bo‘linmagan edi.
Belgiya ichki ishlar vazirligi ma’lumotlariga ko‘ra, aka-ukalar bir necha kun avval hibsga olingan Saloh Abdislom bilan bog‘liq, u o‘tgan yil noyabrida Fransiyada sodir etilgan teraktlar ketma-ketligi tashkilotchilaridan biri hisoblanadi.
Politsiya ma’lumotlariga ko‘ra, aeroportdagi portlashga jami uch kishi aloqador bo‘lgan, ulardan ikki nafari halok bo‘lgan, uchinchisi aerovokzal binosidan qochib qolgan.
Eslatib o‘tamiz, 22-mart, seshanba kuni Bryussel aeroporti va metrosida sodir bo‘lgan bir necha portlash natijasida so‘nggi ma’lumotlarga ko‘ra 34 kishi halok bo‘ldi, yana 200 dan ziyod kishi jarohatlandi. 23-, 24- va 25-mart kunlari Belgiyada umummilliy motam kuni deb e’lon qilindi.
Izoh (0)