Полиция Брюссель аэропортидаги теракт Бельгия пойтахтида яшовчи Халид ва Иброҳим ал-Бакравийлар томонидан содир этилганини аниқлади, дея хабар бермоқда «РБК».
Улар жиноий гуруҳга алоқадорликда гумон қилиниб, қидирувга берилган эди. Хусусан, Брюсселда Халид ал-Бакравий ижарага олган хонадон полиция томонидан бир ҳафта аввал тинтув қилинган, бироқ ўшанда ака-укаларни қўлга туширишга муваффақ бўлинмаган эди.
Бельгия ички ишлар вазирлиги маълумотларига кўра, ака-укалар бир неча кун аввал ҳибсга олинган Салоҳ Абдислом билан боғлиқ, у ўтган йил ноябрида Францияда содир этилган терактлар кетма-кетлиги ташкилотчиларидан бири ҳисобланади.
Полиция маълумотларига кўра, аэропортдаги портлашга жами уч киши алоқадор бўлган, улардан икки нафари ҳалок бўлган, учинчиси аэровокзал биносидан қочиб қолган.
Эслатиб ўтамиз, 22 март, сешанба куни Брюссель аэропорти ва метросида содир бўлган бир неча портлаш натижасида сўнгги маълумотларга кўра 34 киши ҳалок бўлди, яна 200 дан зиёд киши жароҳатланди. 23, 24 ва 25 март кунлари Бельгияда умуммиллий мотам куни деб эълон қилинди.
Изоҳ (0)