Xalqaro futbol federatsiyasi (FIFA) 2016-yil iyulida mazkur sport turida kamsitilishga (diskriminatsiya) qarshi kurashda tashabbus ko‘rsatgan shaxs, guruh yoki tashkilotga beriladigan Diversity Award nomli mukofotni taqdim etadi. Bu haqda “TASS” xabar bermoqda.
Mukofot berilishi FIFA tomonidan irqchilik va kamsitilishga qarshi kurash bo‘yicha rezolyutsiya qabul qilinganining 15 yilligiga bag‘ishlanadi. Yangi mukofot finalchilari va egalarini 11 kishidan iborat hay’at aniqlab beradi. Ular orasida FIFA prezidentligiga sobiq nomzod, Janubiy afrikalik Tokio Sexvale, FIFA ijroiya qo‘mitasi a’zosi, avstraliyalik Moyya Dodd, Germaniya terma jamoasi tarixidagi birinchi qora tanli futbolchi Jerald Asamoa va boshqalar bor.
“FIFA nizomida, qanday ko‘rinishda bo‘lishidan qat’i nazar, futbolda kamsitilishga o‘rin yo‘qligi belgilab qo‘yilgan. Diversity Award kamsitilishga qarshi kurashni o‘z oldiga maqsad qilib qo‘yganlarga atalgan”, — deya ta’kidladi xalqaro tashkilot prezidenti Janni Infantino.
Izoh (0)