Rossiyaning Rostov-Don shahri aeroportiga qo‘nish vaqtida halokatga uchragan Boeing 737-800 layneri 2011-yildan FlyDubai aviakompaniyasining havo floti tarkibida bo‘lgan. Bu haqda “TASS” xabar bermoqda.
Bort raqami A6-FDN, seriya raqami 40241 bo‘lgan bu samolyot o‘zo‘ining ilk parvozini 2010-yil 21-dekabrida amalga oshirgan. FlyDubai samolyotni 2011-yil 19-yanvarida ishlab chiqaruvchi — Boeing kompaniyasidan sotib olgan.
Boeing 737-800 samolyoti “Boing-737” samolyotlari oilasining NG (Next Generation) avlodi vakili hisoblanadi. Samolyot 737-400 modelini almashtirish uchun ishlab chiqilgan va eskisidan yangi qanot, dum tayanchi, raqamli uskunalar paneli va nisbatan takomillashgan dvigateli bilan farq qiladi.
Boeing 737-800 aviakompaniyalar tomonidan 1998-yil aprelidan beri foydalanib kelinmoqda va hozir ham seriyalab ishlab chiqariladi. Ayni vaqtda, 737-800 layneri NG avlodi modellari orasida eng ommabop samolyot hisoblanadi.
Eslatib o‘tamiz, 19-mart, shanba kuni FlyDubai aviakompaniyasining Boeing 737-800 layneri Rostov-Don aeroportiga qo‘nish vaqtida halokatga uchradi. Hodisa oqibatida samolyot bortida bo‘lgan 61 kishi — 55 yo‘lovchi va ekipajning 6 a’zosi halok bo‘ldi.
Izoh (0)