Россиянинг Ростов-Дон шаҳри аэропортига қўниш вақтида ҳалокатга учраган Boeing 737-800 лайнери 2011 йилдан FlyDubai авиакомпаниясининг ҳаво флоти таркибида бўлган. Бу ҳақда «ТАСС» хабар бермоқда.
Борт рақами A6-FDN, серия рақами 40241 бўлган бу самолёт ўзўининг илк парвозини 2010 йил 21 декабрида амалга оширган. FlyDubai самолётни 2011 йил 19 январида ишлаб чиқарувчи — Boeing компаниясидан сотиб олган.
Boeing 737-800 самолёти «Боинг-737» самолётлари оиласининг NG (Next Generation) авлоди вакили ҳисобланади. Самолёт 737-400 моделини алмаштириш учун ишлаб чиқилган ва эскисидан янги қанот, дум таянчи, рақамли ускуналар панели ва нисбатан такомиллашган двигатели билан фарқ қилади.
Boeing 737-800 авиакомпаниялар томонидан 1998 йил апрелидан бери фойдаланиб келинмоқда ва ҳозир ҳам сериялаб ишлаб чиқарилади. Айни вақтда, 737-800 лайнери NG авлоди моделлари орасида энг оммабоп самолёт ҳисобланади.
Эслатиб ўтамиз, 19 март, шанба куни FlyDubai авиакомпаниясининг Boeing 737-800 лайнери Ростов-Дон аэропортига қўниш вақтида ҳалокатга учради. Ҳодиса оқибатида самолёт бортида бўлган 61 киши — 55 йўловчи ва экипажнинг 6 аъзоси ҳалок бўлди.
Изоҳ (0)