Fotogalereya: Viqorli Alp tog‘larining qorli manzaralari

Bu yil O‘zbekistonda qish nisbatan iliq keldi, yanvar va fevral oylari davomida mamlakatning qator hududlarida havo haroratining iliqligi bo‘yicha qariyb 50—100 yillik rekordlar yangilandi, qish ziynati hisoblangan qorning yog‘ishi esa deyarli kuzatilmadi.

Martning dastlabki kunlari yanvar va fevralga nisbatan salqinroq bo‘lmoqda, qariyb bir haftadan beri yog‘ingarchilik tingani yo‘q, xususan, kuni kecha Samarqandda hatto qor yog‘di. Nima bo‘lganda ham, har fasl o‘z o‘rnida, qish esa qori bilan bo‘lgani ma’qul.

“Bu yil qishda qorni deyarli ko‘rmadik”, deb o‘kinishga hojat yo‘q. “Daryo” mushtariysi qorli Alp tog‘laridan fotoreportaj uyushtirdi. Ko‘ring, qordan zavqlaning!

Saslong cho‘qqisi

Mashhur Saslong cho‘qqisi Italiya hududida joylashgan. Dolomiti Alpi deb nomlanuvchi hududda joylashgan cho‘qqi yonida tog‘ chang‘i sporti bo‘yicha jahon kubogi bosqichlari o‘tkaziladi. Hududda 481 ta dor yo‘li va tog‘ chang‘isi bilan shug‘ullanishga mo‘ljallangan umumiy uzunligi 1,2 ming kilometrga teng trassalar mavjud. E’tiborli tomoni, bu dor yo‘llari va chang‘i trassalarining barchasidan yagona chipta orqali foydalanish mumkin.

O‘rmon sukunati

Italiya hududidagi manzarasi betakror o‘rmonning sukunatni chang‘ichilarning kulgusi va hayqiriqlarigina buzadi.

Matterxorn cho‘qqisi

Shveysariyaning eng baland nuqtasi — balandligi 4478 metrga teng Matterxorn cho‘qqisi o‘zining maftunkor shakli bilan kishini hayratga soladi. Mashhur Toblerone shokoladlarida aynan shu cho‘qqi aks etgan.

Tajribali chang‘ichilar yo‘li

Alpdagi eng tik tog‘ chang‘i yo‘llari qora rang bilan alohida belgilanadi. Xususan, Italiyaning Val Gardena hududida joylashgan bunday trassalardan eng tajribali chang‘ichilargina tusha oladi.

Egyuiy-dyu-Midi cho‘qqisi

Fransiyaning Shamoni Monblan hududida 65 kishini birdan Egyuiy-dyu-Midi cho‘qqisiga olib chiqa oladigan dor yo‘li bor. Yo‘l bo‘ylab harakatlanuvchi maxsus transportga 1035 metr balandlikda joylashgan bekatdan chiqib, 2,8 ming metr balandlikni atigi 20 daqiqada bosib o‘tasiz va cho‘qqiga — dengiz sathidan 3842 metrga ko‘tarilasiz. Egyuiy-dyu-Midi o‘zining 360 darajali panorama maydonchasi, tubsiz jarlik ustiga o‘rnatilgan to‘liq oynavand “Tublikka bir qadam” attraksioni va betakror Monblan cho‘qqisini tomosha qilish imkoniyatini taqdim etishi bilan ham mashhur.

2 yevroga vertolyotli tez yordam

Qor bilan qoplangan tog‘ yon-bag‘irlari bilan shahardagi tep-tekis yo‘l o‘rtasida, turgan gapki, katta farq bor. Umrida shahardan tashqariga chiqmagan kishi ilk bor qorli tog‘ga chiqqanida, ehtiyotsizlik sabab, biror kor-holga yo‘liqishi mumkinligi ehtimolini rad etib bo‘lmaydi. Mana shunday holatlarda Alp tog‘larida vertolyotlar yordamga oshiqadi. Bunday “tez yordam” juda qimmat va faqat badavlat mehmonlar uchun bo‘lsa kerak, deysizmi? Aslo! Kuniga 2 yevrolik sug‘urta to‘lovini amalga oshirsangiz kifoya, bexavotir chang‘i uchaversangiz bo‘ladi.

Maftunkor tog‘lar, go‘zal osmon

Italiyaning Brey-Cherviniya tog‘ yon-bag‘irlari hayratlanarli darajada go‘zal. Maftunkorlik masalasida osmon ham tog‘lar bilan raqobatlasha oladi.

Chang‘ichilar yo‘lini tekislovchilar

Minglab chang‘ichilarga xizmat ko‘rsatadigan trassalar har kuni maxsus mashinalar — ratraklar yordamida tekislanadi. Suratda Avstriyaning Mayrxofen hududidagi chang‘i yo‘lida ishlayotgan ratraklarni ko‘rish mumkin.

Alpdagi osuda qishloq

Avstriyaning Finkenberg hududidagi osuda tog‘ qishlog‘i. Suratdagi bejirim imoratlarning qariyb barchasi Alp uslubidagi mehmonxonalardir.

Yungfrau cho‘qqisi

Shveysariyada joylashgan Yevropadagi eng baland temiryo‘l 3453 metrlik Yungfrau cho‘qqisiga olib chiqadi. Bu temiryo‘lning odatiy ikki relsidan tashqari, uchinchi — tishli relsi ham bor. 9 kilometrlik temiryo‘lning 7 kilometri qoya ichidagi tonneldan o‘tadi. Cho‘qqida esa Sizni to‘rt tomonida tengi yo‘q manzara, Eyger muzligining ichiga o‘yib ishlangan Ayoz muzeyi, kinoteatr va restoranlar kutib oladi.